U nongialam ka Bharatiya Janata Party, u Yumnam Khemchand un bam smai kum Myntri Rangbah ka jylla Manipur bad u Nemcha Kipgen kum u Dy Chief Minister, hadien ba ula shah jied kum u nongialam ka seng ha ka jingialang hynnin ka sngi ha nongbah Delhi.
Kane ka long hadien shisnem tam ba ka sorkar pdeng hapoh ka jingialam ka BJP ka la pynjari President Rule ha Jylla Manipur, na ka jingiakhih iapher jaidbynriew hapdeng ki Meitei bad ki Kuki ha jylla Manipur kaba dang bteng haduh mynta.
Ka khubor ka iathuh u Khemchand u dei na ka jaidbynriew Meitei katba u Kipgen na ka jaidbynriew Kuki bad kane ka lah ban pynkut noh ia ka jingiaum snam hapdeng ki jaidbynriew Meitei bad Kuki kaba la nog mynta palat 2 snem.
Kum ban pynpaw ha ka 9 tarik u Rymphang, 2025 u Myntri Rangbah ka Manipur u N Biren Singh ula hiar shuki Myntri Rangbah hadien ka jingialeh bad iaum snam hapdeng ki jaitbynriew Kuki bad Metei kaba la neh jan lai snem.
Ha katei ka por, ka sorkar hapoh ka jingialam u Biren Singh ka duh jingshaniah namar ki jingiakynad ki ar jaidbynriew. Kumta NPP happoh ka jingialam u Conrad K Sangma myntri rangbah ka Meghalaya ka la weng noh ka jingkyrshan ïa ka sorkar ba la ïalam ka BJP ha Manipur bad kynnoh ba u N Biren Singh um lah ban tehlakam ia ka jingkynad hapoh ka jylla na ka jingiapher hapdeng ki jaidbynriew Meitei bad Kuki.
Ka BJP ka don 37 ngut ki MLA ha ka iing dorbar ba 60 ngut bad ka ioh jingkyrshan na ka Naga People’s Front ba don 5 ngut ki MLA bad ka JDU uwei.
Katba liang pyrshah ka don 16 ngut, kynthup ïa ka National People’s Party 6 ngut, Congress 5 ngut, ki MLA 3 ngut shimet bad ar ngut na KPA.