Haduh 22 ngut puid nongpang ka Civil Mairang ha ki 2 sngi, kynthup ïa iba la pang palat 20 snem

Ka jinglah ka Tirot Sing Memorial Civil Hospital Mairang ban ai ia ka jingshakri kaba paka ia ki paidbah khamtam da kaba lah ban pynbiang iaki tiar aijingsumar katkum ka juk kaba mynta kala pynlong iaka AMSI, North East Chapter ban jied ia kane ka Hospital napdeng ki bun ki District hospital hapoh ka jylla ban iohpdiang iaka “Free Laparoscopic Surgery Camp” lane ka jingpuid ei, kaba pynduna ruh iaka jingot iaka doh da kaba pyndonkam iaki tiar stad ka juk mynta. Ha kane ka camp bala pynlong haka 18 & 19 tarik u naiwieng 2024 kila don haduh 22 ngut kiba wan shah puid na kylleng ki district kiba kynthup na South West Khasi Hills, West Khasi Hills, Eastern West Khasi Hills nalor kiwei kiwei bad napdeng ki 22 ngut 17 ngut ki dei kiba shah puid mawksang bad ki don ruh kiba shah puid cyst bad Appendix.

Ki nongshah sumar kila pynpaw iaka jingsngewnguh iaka Hospital kaba la lah ban pynlong ia kane ka camp haka jingiatreilang bad ka Association of Minimal Access Surgeons of India, Northeast Centre da kaba ong, ba lada ki leit shah puid shawei kin ym duna iaka shi lak ka jinglut hynrei lyngba kane ka camp kila ioh iaka jingshah sumar ei khlem da lut pisa bad kiba wan kham najngai kila ioh ruh iaka bai leit bai wan. Haka jngiakren bad ki nongpang kiba la wan ban shah sumar, la lap ba ki don kiba la pang la kham slem hynrei namar ka jingban jong ka jingduk kim shem la ioh lad ban leit shah puid bad iwei na ki longkmie na Riangdo I la iathuh ba I la don ia u cyst naduh u snem 2003 hynrei I dang ioh lad ban puid sa haduh kane ka sngi lyngba kane ka camp. Baroh ki nongwan shah sumar kila pynpaw ba kane ka jngwan jong kane ka camp ha Mairang kala long ka jingkyrkhu iaki.

U Medical Superintendent ka Tirot Sing Memorial Civil Hospital Mairang u bah T.Lyngdoh ula pynshlur iaki paidbah ba kin mih shakhmat ban wan shah sumar ne wan shah puid ha kane ka hospital kaba la don iaki tiar puid katkum ka juk kaba mynta ha kaba ula ong ruh ba ki Nongpang kiba don iaka smart card kim donkam ban siew pisa. La sakhi ruh ba ki doctor (Surgeons) na kylleng ka jylla kila wan ban iarap puid iaki nongpang ha kine ki ar sngi ba don ka Free Laparoscopic Surgery Camp.