Halor ka bording 33 KV bad ki kam pynroi

Na ka bynta jingbit jingbiang ki kam pynroi sha ka thaiñ Western Ri Bhoi bad kumjuh sha ka Jirang Constituency baroh kawei, khamtam halor ka jinglip light khah khah, u Bah Sosthenes Sohtun kum u nongmihkhmat ka thaiñ lem bad ki Nongialam ka Western Ri Bhoi Dorbar hynnin ka sngi ki la leit ban ïakynduh ïa arngut ki Myntri ka Sorkar Jylla kiba kynthup ia u Myntri ba dei peit ia ka kam pohïing bad ia u Myntri kam sam bording ban pyntikna ba ki kam pynroi kin long kiba iaid beit. Haba kren sha ki lad pathai khubor na ka liang u bah Sosthenes Sohtun MLA ka Jirang, u la ïathuh ba ha ka jingiakynduh bad u A.T Mondal Myntri ka tnad bording ka jylla la ioh ban pynsngew ia ka jinglong jingman ka bording electric ka bym long tikna bad ha kajuh ka por la kyrpad  ban pynsted ia ka kam ban kyntiew noh ia ka bording sha ka 33 KV bad kum u myntri u la kular ban shimkhia bad ban pynsted ïa ka kam.

Shuh shuh ha kajuh ka sngi na ka liang u MLA bad ka kynhun kila leit ruh ban ïakynduh bad u Bah Prestone Tynsong ba dei u Symbud Myntri Rangbah bad Myntri ka tnad kam pohiing ka jylla ban ïakren halor ka jingdonkam ban pynurlong noh ïaka jingdon ki kali pynlip ding ne Fire & Emergency Service ha Patharkhmah kumba bun ki iing ki sem ki hap ban mad ïaka jingjia ba sngewsih tang namar ka jingbym don ki kali pynlip ding bad naka liang u Bah Prestone Tynsong u la pyntip ba kane ka kam kala don haka lynti ban urlong noh bad shen yn sa buh mawnongrim ban shna noh ïaka jaka treikam bad jaka ieng jong ki kali pynlip ding ha Patharkhmah. Halor ka jingslem ban pyn trei kam iaka 33 KV katkum ka kular ba la dep, u Bah Sosthenes Sohtun u la Pynpaw ba ka lah ban don katto katne ki daw ki ba pynlong ban shim por ia kane ka kam hynrei naka liang jong u kum u MLA u pyntikna ba ka jingsam bording kaba 33 KV kan sa Urlong noh shen.

Halor ka jingkynnoh ba don ki Shnong haki Khappud kiba tan bording na Jylla Assam, naka liang u MLA u la pynsngew ba u hap ban ioh iaka khaipod kaba tikna naki tnad kiba dei peit bad hangta yn sa lah ban ong eiei halor kane ka jingshim bording ki briew Shnong napoh ka jylla Assam. Na ka liang u Bah Eniasroy Rani  President ka Western Ri-Bhoi Dorbar & Social Welfare Organization u la ong ba kum ki nongïalam ki la pynpaw ka jingsngewkmen kaba khraw halor ka jingkular jong ki myntri sorkar ban pynurlong noh ïa ka jingpynthikna ïa ka bording elektrik ha ka thaiñ Western Ri-Bhoi bad kumjuh ruh ban buh noh ïaki kali pynlip kaba ka kam kala don ha lynti ban pynurlong noh. Ula ong ruh, ba kane baroh ka dei ka jingshimkhia jong u MLA ban lum ban lang ïaka kynhun ki nongïalam shnong naka bynta ka jingbit jingbiang jong ki paidbah ka thaiñ bad kyrmen skhem ruh ba kum u MLA un dang lah ban trei bha bad ban wanrah ki kam pynroi haka thaiñ Jirang hi baroh kawei.