Halor ka jingpaw nam ka Byrnihat ba jaboh tam

U Myntri Rangbah ka Jylla Conrad K Sangma hynne ka sngi ula pyntip ka Sorkar Meghalaya lem bad ka Sorkar Assam kin thaw ka Joint Action Plan ban leh jurip halor ka jingkylla ka Byrnihat kum ka sor ba jaboh tam ka lyer ha ka pyrthei.

Ïa kane u Conrad u la pyntip hapoh ka Iingdorbar thawaiñ haba pynpaw ia ka kaiphod jong ka AQAir’s World Air Quality Report, 2024 ba ka Byrnihat ka dei ka sor ba jaboh tam ka lyer hapoh ka pyrthei.

Haba wanrah ia ka Suo Moto Statement hapoh ka Iingdorbar Thaw Ain, u Conrad u la ong ba kat kum ki jingkhein jong ka Meghalaya State Pollution Control Board (MSPCB), ka jingpynmih tdem jong ki karkhana na ka Industrial Estate ka Jylla ki dei kiba dang hapoh u pud uba biang ne kaba dang biang.

“Nga la dep thoh shithi sha u Myntri Rangbah ka Assam Himanta Biswa Sarma halor kane ka kam. Nga la kyntu ia u (Assam CM) ban don noh da ka Joint Action Plan (ban leh eiei ia kane ka kam) naba ka Byrnihat ka dei ka sor ha khappud ha kaba baroh arliang ki don ia ki karkhana” la ong u Conrad.

U Conrad u la ong ba watla ka Meghalaya kala shah pynpaw marwei ha ka kaiphod jong ka AQir hynrei ki jingsngewkhia na baroh arliang khappud bad kane ka kam ka dei kaba hap ban leh eiei da baroh artylli ki Jylla haba bynrap ba kila don ki ain ban pynthikna ba ki Jylla kin hap iatreilang ban leh eiei ia kum kine ki kam.

U la ong ba ka kaiphod jong ka AQAir’s World Air Quality Report, 2024 ka kdew ba ka Byrnihat haba thew ia ka PM2.5 kala kot ia ka 128.2 microgram per cubic meter (ug/m3) bad kat kum ki jingkhein bala pynmih na ki 4 tylli ki Manual Ambient Air Quality Monitoring Station jong ka MSPCB ba don ha sor Byrnihat, ka jingpynmih ia ka PM2.5 jong u snem 2024 ka long 50.1 microgram per cubic meter (ug/m3)”.

“Nalor kata, kat kum ka jingkhein ka MSPCB naduh u Kyllalyngkot haduh u Lber 2025, ka Air Quality Index (AQI) jong ka Byrnihat la shem ba ka dang biang (satisfactory)” u la bynrap.

U Conrad ula pyntip ia ka Iingdorbar ba ka MSPCP kala pynlong ia ki jingjurip ba kynsan kynsan ia ki karkhana ha EPIP bad 13 Mer ha ka 24, 27 bad 31 tarik Kyllalyngkot 2025 bad 5 tarik Rymphang 2025. Kane ka jingjurip kala pynpaw ia ka jingpynkhein ia ki kyndon pynmih tdem bad pynih tdem ba shyrkhei bha da ki karkhana namar ka jingbym pyntreikam ia ki Pollution Control Devices ne ki kor ban pynduna ia ka jingpynmih tdem, ka jingbym treikamki kor bad ka jingbym ai jingkhein ki kor ia ka jingpynmih tdem.

Namar kata, ka MSPCP kala phah notice ban khang dam ia ki 7 tylli ki karkhana ban pynngat ha ka kuna ban siew bai pyn jaboh mariang ia ki 2 tylli ki karkhana. U Conrad u iathuh ba hadien ka jingkhangdam ia kine ki 7 tylli ki karkhana ha Byrnihat, Meghalaya naduh ka 29 tarik Kyllalyngkot haduh 11 tarik Lber, 2025, la lap pat baka AQI bala pynmih n aka Continous Ambient Air Quality Monitoring system (CAAQMS) bala pynieng ha ka Central Academy for State Forest Service (CASFOA) Burnihat, Assam, ka dang pynpaw ba ka AQI ka long kaba jaboh bha ha kiba bun ki sngi.

U la ong ba ka Byrnihat Industrial Area ha Assam, kaba don ha syndah ka sor Byrnihat, Meghalaya, ka dei kaba la ithuh kum ka Critally Pollution Area (CPA) ne ka jaka ba jaboh bha da ka Central Pollution Control Board (CPCP), Delhi. “Ha ka jingshisha, lah ban kdew ba ki don haduh 20 tylli ki karkhana bala ai kyrdan Red Category ha Byrnihat Assam haba ianujor bad 5 tylli kiba don sha ka liang ka Meghalaya” ula bynrap. U Myntri Rangbah u iathuh ba kat kum ka jingbthah ka National Green Tribunal (NGT), ka Assam Pollution Control Board (APCB) kala pynkhreh ia ka Action Plan bad kala shim ruh ia ki sienjam ban tehlakam ia ka jingpynmih tdem jongki karkhana bad ban pynioh biang ia ka lyer kaba khuid ha ka thain Byrnihat ka Assam.

U la pyntip ba ka MSPCB kala thung ia ka Council of Scientific & Industrial Research-National Environental Engineering Research Institute (CSIR-NEERI), Kolkata ba kan pynlong ia ka Emission Inventory & Source Apportionment Study ia ka Byrnihat.