Halor ki kam pynroi iamir jingmut u Myntri bad ki Waheh shnong ha Jowai

U Myntri ka tnat health and family welfare, ka tnat sports and youth affairs ka sorkar jylla u Wailadmiki Shylla, mynta ka sngi ula lum jingialang iaki waheh shnong ka sor Jowai ha conference hall DC ophis Jowai, naka bynta ban iamir jingmut iaki kam pynroi hapoh ka sor Jowai, kynthup ruh ka jingiamir jingmut haba iadei bad ka jingdheng kali, ka rukom pyniakhlad iaki ñiut, ka jingpynkhuid iaka wah Myntdu bad ruh ka jingiamir jingmut halor ki ksew surok. Ha kane ka sngi la donlang ruh u DC ka West Jaiñtia Hills District u Abhinav Kumar Singh, IAS, ka SDO Sardar Jowai ka Vevotolu Kezo, IAS, ka D.V Lyngdoh Additional Deputy Commissioner kaba dei ruh ka CEO jongka Jowai Municipal Board, nangta u officer ka tnat District Transport Officer, West Jaintia Hills,u Officer naka tnat Traffic ka Jowai Police Station bad kiwei.

Haba kren shaki lad pathai khubor u Myntri Wailadmiki Shylla u ong, haba iadei bad ka jingpyniakhlad iaki ñiut ha sor Jowai, u sngewtynnad ban tip naka CEO Jowai Municipal Board halor ka jingiatreilang ki dorbar shnong bad ka Municipal Board kata ban pyniakhlad hapdeng ki ñiut ba rkhiang bad ba jhieh. U iaroh ruh iaki dorbar shnong kiba ai ka jingkyrshan naka bynta ban pyniakhlad iaki ñiut. Ha kajuh ka por u iathuh ruh ba ka jingpynkhreh iaka jaka theh ñiut ka dang iaid shakhmat.  Halor ka mat jong ki ksew surok pat u ong, kumba la ai hukum daka ïingbishar ba dei ban peitngor iaki, kumta la iakren iamir jingmut bad don ruh ki sienjam bala shim naka liang ki bor district. Haba iadei bad jingsakut kali ruh u iathuh ba kila pyrshang wad lad kumno ban pyntikna iaka jingiaid beit ki kali.

Shuh shuh kumba la don bun ki surok hapoh Jowai naduh kiba rim bad kiba dang thymmai u Wailadmiki ula ai jingmut iaki waheh shnong ban buh kyrteng iaki surok hapoh Jowai khnang ban pynsuk iaki paidbah ba kin tip lada iaid na uta u surok lah ban mih hangta hangta. Bad kane ka jingthmu buh kyrteng ka long ruh shi bynta ban pynsahnam iaki riew ryngbah riew pawkhmat ka shnong Jowai, ka Rilum Jaiñtia bad ka Jylla. Nangta haba iadei bad ka jingthmu pynkhuid iaka Myntdu naka bynta ka jingjrong ba 14Km, u ong shen ynsa leh ia kane daka jingkhmih lynti ban don haduh kumba 5000 ngut ki nongshong bynta.