Hap u Mawbah ba twa kyndew Mylliem, shlei um ha Polo

Ka jingiaid bteng ka jingther u slap ha kylleng ka jylla ka la buh ia ki paidbah jingma khamtam ki nongleit nongwan na ka jingjia twa khyndew bad shlei um bad kane ka la pynthud ia ka leit ka wan jong ki paidbah. Kane ka jingther u slap ka la ktah ia ka leit ka wan ki paidbah bad kumba ju long hi man la ka snem tang shu la poi ka aiom lyiur bad haba ther u lapbah ka la mih beit ka jingshlei ha katto katne ki bynta ka nongbah Shillong, mynta ka kynti ruh ka don ka jingshlei um ha ka thain Langkyrding, Polo, Pynthor Umkhrah bad kiwei kiwei ki jaka namar ba kiew kynsan ka um ha Wah Umkhrah.

Ka jingshlei um kam dei ba kiew ka um na Wahumkhrah hynrei ka dei bym biang ki nala bad namar ka jingbret jaboh pathar, ka um kam ioh shuh ban tuid ka sahkut bad ka pynlong ia ki surok bad ia ki jaka ban shlei um. Ka la don ka jingjia ha kaba uwei u mawbah ula tyllun na ka jingtwa khyndew ha ka surok Mylliem-Umtyngar bad na ka bynta ka jingshngain ki paidbah kumta la khang noh ia ka surok na 7 Mer, Upper Shillong ban leit sha ki thain Sohra.  Halor kane ka jingtyllun u mawbah ba sahkut hapoh surok na ka liang ka National Highways & Infrastructure Development Corporation Limited (NHIDCL) ka la pynbthei da u bom ban pynpra ia une u mawbah bad hadien kane ki la pynkhuid ruh ia jaka ba twa khyndew.

La iathuh katba ka jingpynkhuid ka dang iaid shakhmat la khang shwa ia ki nongleit nongwan ban lair na ki jingjia ba sngewsih. La ioh jingtip ba don ka jingtwa khyndew ha ka thain Langkyrdem bad na ka liang ki bor sorkar ki la kyntu ia ki paidbah ba kin kiar ban leit sha Pynursla lada donkam kyrkieh ne ki lah ban iaid na kiwei ki surok ha ka thain.