Hapdeng ka jingduh jingkyrmen, ieng ka shlem ai jinghikai ia ki khynnah ha Tiehsaw

Kan long lehse ka khana ba sngewtynnad na ka bynta ki kmie ki kpa kiba la duh jingkyrmen baroh shikatta ban plie lad ia la ki khun ba la kha kyrpang ban ioh lem ia ki jinghikai kiba biang ha ki skul ba kyrpang, ha kaba mynta kawei ka longïing kaba la iohi ia kane ka jingeh, ka la sdang da la i jong i bor barit ban plie ia ka shlem ai jinghikai na ka bynta ki khynnah ba dang rit bad kumjuh ban iarap kyrpang ia kito ki khynnah kiba la kha kyrpang. Kane ka skul ka dei kaba la seng da u Bah F.K Nongrum bad Kong G. Kharlyngdoh hapoh ka shnong Tiehsaw bad la ai kyrteng ia kane ka shlem, ka Brenda’ s Playing Garden and Early Intervention Centre kaba ki la jer ha ka kyrteng jong i khun kynthei ba marwei ba la khlad noh i (L) Ornella Brenda Kharlyngdoh.

La plie paidbah ia kane ka skul da u Rev.B. Ramsiej, uba dei u Missionary ka KJP Synod uba trei mynta ha Kathmandu, Nepal ha ryngkat ka jingiadonlang u Dr.R.Marwein, Medical Officer na DM&HO, U DCPO ka WKH Bah D.Shabong, u Rev. L.H Nongsiej, Tbn. C.L Wanshong uba la pyniaid ia ka jingialang, I kong Delfi Lyngdoh, Special educator na Mary Rice Centre, u sordar ka shnong Tiehsaw Bah M.Dkhar, u Bah Adoni Kharlyngdoh bad Berilin Jyrwa kiba dei ki nonghikai ha katei ka skul, ki kmie ki kpa  bad kiwei kiwei. Ha katei ka sngi na ka liang u kongsan u Rev B.Ramsiej u la ong ba la plie ia kane ka shlem ha ka lyngkhuh sngikha jong i (L) Ornella Brenda Kharlyngdoh bad kane ka sngi kam dei ba ngin jaw ummat hynrei ba ngin kmen namar ha kane ka sngi u la mih u soh bad kane ka dei ka jinglah jong kiba ha iing ban plie ia kane ka shlem hikai ba la ainam ha ka khun ba la khlad noh.

Kum ka jinghikai bad ai mynsiem ia katei ka iing, u Rev. B. Ramsiej u la pule ruh katto katne ki dkhot na ka ktien jong u Blei bad u la ai mynsiem ruh ia ki nonghikai bad kiba ha iing ba kim dei ban kynran dien wat haba kin iakynduh ia kiba bun ki jingeh, hynrei ba kin iaid shaphrang bad ba u Blei un don ryngkat bad btin lynti ia ki ha kane ka jingshakri ia u para briew, khamtam ia kito ki khun kiba don hapdeng ka jingduh jingkyrmen. Ha katei ka sngi, na ka liang u Bah Adoni Kharlyngdoh uba dei u khun jong katei ka iing bad para jong i (L) Ornella Brenda, u la pynsngew ruh halor ka rukom ai jingshakri hapoh kane ka shlem ba kynthup ia ka Play Garden bad ka Intervention Centre.