Hapdeng ka jingiatylli, ka jingpang ba shyrkhei dei ka jingbishni

Ka seng Jaiñtia National Council JNC ha ka 10 tarik mynta u bnai ka la lehkmen ia u mawmer dap shiphew snem ka jingiaid lynti ban shakri ia ka imlang sahlang ha ryngkat ka jingsakhi lang ki para nongialam sengbhalang na kiwei pat ki seng, ki nongialam ka Synjuk ki Waheh Chnong Ri Jaiñtia, ki longkmie longkpa, ki khun samla, ki riew pawkhmat ba shah khot sngewbha bad kiwei. Ha kane ka sngi lehkmen ka seng JNC ka la pynkup burom ruh ia ki khynnah ba lehbha ha ka exam SSLC myntra u snem, ka la pynkup burom ia ka kmie u President barim jong ka uba la khlad u (L) Shanbok L Syad, bad kala pynkup burom kyrpang ia u lad pathai khubor banyngkong ha ka ktien Pnar u “Wyrta”. U President ka HYC ba dei ruh u chairman ka COMSO u Roy Kupar Synrem haba kren u ong lyngba  kane ka lyngkhuh dap snem ai ba ka mynsiem jingialeh ruh kan nangrhem ym ban kut tang haka jinglehkmen.

U ong ruh kum ka jaitbynriew rit paid dei ban long kiba iatylli khnang ban lah iakhun ia kiwei pat ki bor ba thmu thombor pynduh jait ia ka jaitbynriew jong ngi. Ula pynkynmaw ruh halor ka jingiakhun pyrshah ia ka Citizenship Amendment Act ha u snem 2019 bad na ka liang ka sorkar kmie ruh ka la pyllait noh ia ka Meghalaya na ka CAA ba don ka Sixth Schedule. Hynrei kumba long mynta u ong ka jingeh ba khraw ba ka jaitbynriew ka mad dei ka jingpur sted  u drok. Bad kaba suk tam ban pyntlot ia kano kano ka jaitbynriew dei lada ki khun samla  ki ngop ha u drok bad kiwei ki kam sniew ha ka imlang sahlang, kumta ka jingioh rung suk u drok ha kane ka ri jong ngi lah ban dei  ka kam buit poh kiwei pat ki jaitbriew ban pynjot ia ka jaitbynriew jong ngi. Na ka liang u President ka JNC u Sambormi Lyngdoh haba kren ula ban jur halor ka jingdonkam ka jingiatylli da kaba ong, ka jingpang ba ma ha kine ki sngi dei ka jingshun jingbishni.

U ong ha ka jingiaid lynti ka seng wat la ka jingiakhun ban pynrung  ia ka ktien pnar ha ka State Anthem ka la long jop ruh kim pat hun namar kumba ia ka Jylla Meghalaya la pynwan dur da u Khasi Garo bad Pnar, bad kumba ia ka ktien Garo ktien Khasi la dep pynrung hapoh ka Meghalaya State Langauge Act ki kwah ba ka ktien Pnar ruh ka rung. Bad kane ka jingkwah jong ki kam mut  ban pynphar ia jaitbyntiew kumba don kiba kynnoh, hynrei ki dawa ia ka lynti ba dei hok ban pynneh pynsah ia ka  ktein Pnar kumba la kyrkhu da u blei bad ki riew tymmen. U iathuh ruh ba haka lynti ba 10 snem ka seng ka la mad shibun ki jingeh la haba ia dei ki jingshah tynjuh ha ki bor ka aiñ haba mih iakhun dawa ia ka hok jong ka ri ka jaitbynriew. Lyngba kane ka jinglehkmen dap shiphew snem u wer u kyntu ruh ia ki kynhun seng bapher bapher, ki paidbah ba kin ai ka jingiatreilang bad ka seng haki sngi ki snem ba shakhmat.