Hapdeng ka jingiphuh leh burom khadduh ka sorkar ia u Dr DD Lapang

Ka sorkar jylla hynne ka sngi ka la pynlong ia ka jingleh burom ba khadduh ia u Myntri Rangbah barim ka jylla u Dr DD Lapang ha madan Student Jaiaw, Shilong ha ka jingiphuh iphieng wat hapdeng ka jingpynthud ka mariang na ka jingther slap. Shuwa ban rah ia ka met sha Madan Student Jaiaw, la pynlong ia ka jingialeh burom khadduh ia u Dr DD Lapang ha Iingsah jong u da ka Balang Jaiaw Presbyterian bad kumjuh ha u lum jingtep jong ka Balang Jaiaw Presbyterian ha Weiking, Shillong.Ha kane ka jingialang leh burom khadduh ia u Dr DD Lapang ha Madan Student Jaiaw, donlang u Myntri Rangbah Conrad K Sangma ryngkat kiwei ki Myntri Sorkar, u nongialam ka liang pyrshah u Dr Mukul Sangma, u Chief Secretary bah DP Wahlang, ki nongialam seng sain pyrthei bapher bapher, ki ophisar bad ki riew paidbah. Ki heh ki hain bad ki kynrem ki lyndan baroh ki la buh syntiew ha ka synduk u (L) Dr DD Lapang kaba la tap don burom da ka lama lai rong ka Ri bad kum ka dak ban ai ka burom, ka la don ruh ka jingsiat suloi ba laisien (Gn Salute). Haba kren ha kane ka sngi u Myntri Rangbah ka Jylla u Conrad K Sangma ula ai ka burom naduh ka dohnud ia une u Myntri Rangbah barim Dr D.D Lapang, haba niew ia u kum u Nongialam ba trei minot hi, uba la aiti ia la ka jong ka jingim ban shakri ia ka Meghalaya bad ki paidbah.

U Conrad ula pynkynmaw ia ka jingsdang kaba rit jong u Dr Lapang bad ka jingkiew jong u sha ka kyrdan kaba pawnam lyngba ka jingtrei shitom bad jingkut jingmut.“Ka jingleit noh jong u Dr DD Lapang kam dei satia tang jong lajong shimet, hynrei jong ka Meghalaya hi baroh kawei” la ong u Conrad.U Conrad haba kren ula kynmaw ia ka jinglong nongialam ba skhem u Dr Lapang, naduh ki sngi ba sdang ka jingiakhih Hill State haduh kaba mynta, kum ka sharak jong ka jingkyrmen bad ka jingskhem.U Conrad ula iathuh khana ia ka jingiadei jong u shimet bad u Dr Lapang, haba ithuh ia u naduh ba u dang khynnah lyngba u Kpa, u Purno A Sangma bad kham hadien ula ioh ia ka burom ban ia shakri ha syndah bad u Dr Lapang hapoh ka Iingdorbar Thaw Ain ka Jylla.“U dei ruh u nongkren uba don ia ka bor bad ula shakri da ka jingshemphang kum u Myntri Khynnah, Myntri Sorkar, Myntri Rangbah bad Nongialam ka Liang Pyrshah. Ka sur jong u ka la sawa jam ha ki kynroh ka Iingdorbar Thaw Ain bad poi ruh sha u mawmer ba khatduh” ula ong. U Myntri Rangbah ula ban jur ruh ia ka jingngeit jong u Dr Lapang ha ka jingiakren, ka jingsuk bad ka roi ka par kaba suhthied na ka jingithuh kyrpang jong ka Meghalaya. U la iaroh ia ki jinghikai u Dr Lapang halor ka kam nongialam, kaba ban jur ia ka jingshakri khlem da donkam ia ka jingiathap kti, ban ieng syndah u briew ba khatduh tam bad ban shakri ia kiba rit tam napdeng jong ngi.

U Conrad ula kren ruh halor ka synniang jong u Dr Lapang ia ka Jylla, kynthup ka jingpynkhlain ia ki bor synshar khadar, ka jingkynshew ha ki samla, ka jingpynshlur ban kyntiew ia ka jingbishar ba hok bad ba kdup lang ia baroh, bad ban plie lynti ia ka jingsuk lyngba ka jingiateh kular sangeh iasiat bad ki kynhun kaikhlaw. Ula pynkynmaw ia ka jingtrei u Dr Lapang ban kyntiew kyrdan ia ka Ri-Bhoi bad ka Baghmara kum ka District, ban pynkha ia ka Meghalaya State Women Commission, bad ban kyntiew ia ka jingshakri ha ka koit ka khiah lyngba ki prokram kum ka Cancer Detection Program bad kiwei kiwei. Ula ban jur ba ki matti u Dr Lapang kan nang iai bteng ban ai mynsiem ia ki pateng ban wan bad ba ka Jylla kan nangkiew shakhmat ia ki jingiohi jngai jong u, bad ban iatylli da ka jingmut. Na ka liang u Nongialam ka Liang Pyrshah u Dr Mukul Sangma haba pyndon burom khatduh ia une u Nongialam, ula kynmaw ia ka jingshakri ba neh slem bha jong u Dr Lapang ia u paidbah bad ka jingioh jong u ia ki lad ban bteng ia ka jingshakri wat hadien ba la noh ka met. U Mukul ula pynpaw ba u ju peit ia u Dr Lapang kum u nonghikai ban shim nuksa ha shuwa ba un rung sha ka jylli sain pyrthei. U la pynkynmaw ia ka jinglong nongialam u Dr Lapang ha ka Congress Legislature Party ha u snem 1988 bad ka jingkut jingmut jong u ban bteng ia ka jingshakri paidbah, wat hadien ka rta ba 69 snem.

U la iaroh ia ka jinglah u Dr Lapang ban aiti bad saindur ia la ki jong ki paralok, wat hapdeng ki jingduna ba bun jong ki. U ong ba ka jinglong ba iai shah jong u Dr Lapang, ka jingiai minot, bad jingtrei shitom ki dei ki jinglong ba kongsan kaba pynioh ia u ia ka jingshaniah bad ka jingsngew skhem jong ki paralok ba iatreilang.U Symbud Myntri Rangbah ba khmih ia ka kam Pohiing (Police) u Bah Prestone Tynsong ula ong ba ka Jylla ka la duhnoh ia ka nongialam ba radbah da ka jingkhlad noh u Dr Lapang, uba la noh synniang shi katdei ha ka roi ka par jong ka jylla Meghalaya.Napdeng kiba bun ki synniang jong u, u Bah Prestone ula ong ba ia u Dr Lapang yn iai kynmaw kum u nongprat lynti ba hakhmat eh ban seng ia kiba bun ki jaka pule bad ki seng trei mon sngewbha hapoh ka Jylla, kiba la iarap ha ka jingkiew shaphrang bad ka roi ka par ka Meghalaya.U Symbud Myntri Rangbah ula iathuh khana ia ka jingshem jong u shimet ha ka jingiatreilang bad u Dr Lapang, haba pynkynmaw ia ki jingiasyllok halor ka roi ka par ha baroh ki liang jong ka Jylla. Ula iathuh ba u Dr Lapang ula wan iasoh bad ka National People’s Party (NPP) hadien ba u ieh noh ia ka Congress, namar ka jingiohi jngai jong u na ka bynta ka jingkiew shaphrang jong ka Jylla.Na ka liang u khun jong u (L) Dr DD Lapang, u Bah BR Blah haba kren ha kane ka sngi ula ai ka burom ia ka jinglong nongialam bad ki matti jong u Kpa haba ban jur ba u Kpa jong u, u ngeit skhem ha ka jingshakri ia kiwei ha ka jaka ban beh ia ka bor. U Bah Blah ula pynkynmaw ia ka jingsdang ka lynti iaid kaba rit jong u Kpa kum u nonghikai bad ka jingkut jingmut jong u sha ka pule ka dangle kum ka lynti ban pynkup bor ia kiwei.”Ka jingstad ka dei ka sharak ia ka jingdum” la ong u Bah Blah ba ki dei ki kyntien u kpa bad ula kdew ia ka jingkongsan ka jingnang jingstad ban iarap ia kiwei ba kin shem ia la ka lynti iaid. Ula pynpaw ba u Kpa jong u, u la kit ia ki jingkyrmen jong ka Meghalaya da ka jingai ei bad ka sngewrit, khlem da klet ia la ki tynrai. Kum u Nongai jingmut ba rangbah jong ka Sorkar, u Dr Lapang u la iai bteng ban nangioh jinghikai bad hikai ruh ia kiwei, haba ai mynsiem ia ki da ka rukom long nongialam jong u.