Hapdeng ka jingpyrshah ka MGSPHSVA bad TUR

Wat hapdeng ka jingpyrshah ka Meghalaya and Greater Shillong Progressive Hawkers and Street Vendors Association (MGSPHSVA) bad ka Thma U Rangli-Juki (TUR), ka Shillong Municipal Board (SMB) hynne ka sngi ka la iaid beit ia ka jingpynkhalai nusib hapdeng ki nong die jingdie madan.

Kane ka jingpynkhalai nusib da ka SMB ka dei ban pynthikna ba kan nym don kano kano ka jingleh shilliang khmat ha ka ban ai jaka ia ki nongdie jingdie madan ha ka jaka ba la ithuh da ka Sorkar ha jrong duh ka Parking Lot MUDA Khyndai Lad.

Katba ka jingpynkhalai nusib ka dang iaid ka kynhun Meghalaya and Greater Shillong Progressive Hawkers and Street Vendors Association (MGSPHSVA) ba ialam da ka Kong Biolin Pyrtuh bad ka Thma U Rangli-Juki (TUR) ba ialam da ka Kong Angela Rangad ki la wan poi ha Parking Lot MUDA ban pynpaw ka jingpyrshah.

La mih ka jingiapyninia ba jur hapdeng ka Kong Biolin Pyrtuh, ka Kong Angela Rangad bad ki nongtrei ka SMB ha kaba kine 2 ngut ki longkmie ki la pynksan ba kam iahap ban pynkhalai nusib ban ioh jaka die jingdie namar ki nongdie madan kim dei ki nongkhalai.

Wat la ka MGSPHSVA bad ka TUR kila pynpaw ka jingpyrshah ban leh daka khalai nusib hynrei naka liang ka kynhun nongdie jingdie madan hapoh ka lama Shillong Roadside Hawkers haka jingialam ka Kong Tellme Nongbri kila kyrshan iaka SMB bad kila ieng line ban ap iala ka pali.

Hadien ba la ioh jied ia la ki Nomber, ki nongdie jingdie madan kiba shim bynta ha ka khalai nusib ki la leit sha ka ki jaka ba ki la ioh ban shong kaba don ha Parking Lot MUDA.

Watla ka don ka jingiatai nia hapdeng ka Kong Angela Rangad bad ka Kong Biolin Pyrtuh hynrei na ka liang ka SMB ka la iaid beit ban pynkhalai nusib bad ki nongdie madan ruh ki kohnguh da ka ba ieng Line ban ioh u Number ban tip, ia ka jaka ba kin ioh shong die jingdie biang ha Parking Lot MUDA.

Lah iohi ruh ba hadien ba ka SMB kam sngap ia ka jingwan pynsangeh ia ka khalai nusib, ki nongdie madan ha ka jingialam ka Kong Angela Rangad bad Biolin Pyrtuh ki la mih noh na katei ka jaka.

Tang hadien katto katne kynta, kine ki nongialam ka Greater Shillong Progressive Hawkers and Street Vendors Association (MGSPHSVA) kynthup ka Kong Biolin Pyrtuh bad u Bah Shane Thabah ki la wan phai biang sha Parking Lot bad ki la sdang ieng Line ban shim Slip.

La ïohi ba ka Nongialam ka kynhun pyrshah ia ka SMB ka Kong Biolin Pyrtuh ka la ioh da ka Nomber 220 ban shong dukan ha ka jaka ba la ithuh da ka Sorkar ha Parking Lot MUDA.