Hapoh 10 bnai, yn plie ia ka Iawmusiang Market Complex Jowai

U Symbud Myntri Rangbah ka Jylla u Bah Sniawbhalang Dhar ula pyntip ba hapoh 10 bnai yn ioh ban plie noh iaka Iawmusiang Market Complex kaba don ha Jowai West Jaintia Hills. U Bah Sniawbhalang ula ïathuh ba ka jingpyntrei ia ka Iawmusiang mynta ka la kynjoh ym don ia ka 79% bad u la pynthikna ba hapoh u snem 2026 ki nong shong iew kin ioh ban bteng biang iaka kam khaïi hapoh ka Iawmusiang Market Complex Jowai.U la ong ba hadien bala plie iaka Market Complex ki nong shong iew na jan ka Kiang Nangbah Stadium kin wanphai biang shaka Iawmusiang bad iaki ba tam yn pynshong sha ka Iew kaba don mynta.

“Ka Iawmusiang Market Complex kan don ym duna iaka 400 tylli ki dukan bapher bapher kumba long ha Iewduh ha Shillong bad nalor ki dukan kan don ruh ki jaka ïeng kali (Parking Lot) bad kiwei kiwei ki jingdonkam iaki nong shong iew bad ki nongthied nongbet” la ong u Bah Sniawbhalang.Haba kylli mano ban peit iaka Iawmusiang Market Complex hadien bala plie paidbah, u Symbud Myntri Rangbah u la ong “Hadien baka tnat PWD (Building Division) kala pyndep iaki kam baroh, ngin aiti iaka Complex shaka JHADC bad kan shong haka District Council ban rai, mano ban peit”.U Symbud Myntri Rangbah u la ïathuh haduh mynta ka jinglut ban pyndep tei iaka Iawmusiang Market Complex kam duna iaka T.30 klur namar bala shah pynsangeh pyntrei iaka Complex naduh u snem 2026.

U la ong ba ka Iawmusiang Market Complex kan long kum ka Iew tynrai (Traditional Market) bad kan iarap ruh ban kham pynkylluid iaka sor Jowai bad ban pynduna iaka jingdheng kali.“Kane ka Iew kan long ka jingkhyrkhu iaki nong shong shnong ka sor Jowai bad ka thaiñ Jaintia Hills baroh kawei bad nga kyrmen ba kan iarap ban kyntiew iaka ioh ka kot jong ki nong shong shnong” u la ong.