Hapoh 2035 pynkhreh pynkhlaiñ pynmih bording hapoh ka Jylla

Ka tnat Bording jong ka Jylla ka la pynkhreh iaka thong (Plan) kaba janai ban pynthikna baka Meghalaya kan pahuh bad kan khlain haka jingpynmih bording naduh u snem 2035. Ïa kane la pyntip da u Myntri ka tnat Bording u AT Mondal bad u la ong ba haduh mynta ka Jylla ka dang pahuh Bording bad ka jingsakhi kadei namar ba naduh u snem 2024, ka tnat ka khlem pynbna iaki kynta pynlip bording (Load Shedding) hapoh ka Jylla. Haba kren sha ki lad pathai khubor u Mondal u la ong “Kumba ka long, mynta ka jingpynmih bording ha Jylla, ngi la nang kiew suki suki watla ka jingkiew jong ngi ka kham iapher haba nujor bad kiwei ki Jylla. Ngi la pynkhreh ia ka plan kaba bniah bha na ka bynta u 2035 bad ynda ngi poi ha u 2035, ngin sa iohi kumno ka jingpynmih bording ka Jylla ka long”.

U Mondal u pyntip ba ka Sorkar lyngba u Myntri Rangbah ka Jylla ju iakren man ka por bad ka Ministry of Power ka Sorkar Pdeng ban pynsngew haba iadei bad ki sienjam baka Sorkar Pdeng ka lah ban shim ban iarap iaka Jylla. “Ngi la pynsngew ia kiba bun ki kam kiba lah ban iarap da ka Ministry. Baroh kine ki kam kila iaid bad ngi pynkhreh ia ka plan ban kyntiew kyrdan haba phai sha ka jingpynmih bording, ka jingdon nongtrei bad baroh kiwei kiwei kynthup ka jingkyntiew ia ki rukom treikam hashuwa ba ngin poi u 2035” u la ong.

Haba kylli, u Myntri ula ong “Ngi donkam ban kyntiew kyrdan ia ki kor ki bor jong ngi, Hadien ba dep ka RDSS, ngin sa poi ha ka kyrdan kaba biang bha namar ki kam kila sdang bad kila nang iaid. Kaba ar ka long ba kan pynduna ia ki jingduhnong jong ngi lyngba ka RDSS bad ka don ruh ka jingpyndait ia ki smart meter kiban sa nang pynduna ia ki jingduhnong bad kyntiew ia ka jingpynmih pisa. Ngi la phaikhmat mynta sha ka transmission bad generation”.Ha kajuh ka por,u Myntri ula pyntip ba ka lyiur kala wan bad ka Jylla kan don ha u pud ubym don jing khuslai shuh haba phai sha ka jingsam bording.