Hapoh shikynta, T.1 lak ioh lum kuna na ki kali ba pynkhein ain

Ki bor pulit ka Ri Bhoi District lyngba ka Nongpoh Traffic Branch sa shisien ki la shim ia ka sienjam ban ai jinghikai ha kaba iadei bad ka jingdonkam ban pynbit pynbiang ia ki kot ki sla kali haba iaid ha surok bah kumjuh ruh ban burom ia ki kyndon ain, ha kaba tang hapoh shikynta ki pulit ki la ioh ban daiñ kuna haduh 1 lak tyngka tam na nongniah kali khlem kot khlem sla ba pynkhein ia ki kyndon ain.

Ha ka jingtalasi ia ki kali naduh ki kali shimet, ki kali kamai ki kali lai shaka, la pynlong ha lad Sericulture hajan Nongpoh ha kaba la sakhi lang ruh da u Additional Superintendent of Police (Incharge Traffic) u Bah Orville Massar, u Officer In-charge ka tnat Traffic u Rubul Ali nalor kiwei kiwei ki heh officer.

Na ka liang u Bah Orville Massar, kum u heh pulit u la iathuh ba ia kane ka jingtalasi ne ban ai jinghikai ia ki nongñiah kali la pynlong katkum ka jingbthah na u Superintendent of Police ka Ri Bhoi District, ban pyrkhing ia ka jingpynkhein ia ki kyndon niah kali, ka jingtah iit ïong ha ki kali, ka jingpyndonkam ia ki siren, ka jingdonkam ban pynbiang ia ki kot ki sla bad kiwei kiwei kiba long kongsan bha haba niah ia ki kali ha u surok bah.

“Haba phi niah ia ki kali ha u surok bah, pyntikna ba phi don ia ki kot ki sla ba biang naduh ki lisen, ki kot kali bad ruh ban pyntikna ba phin burom ia ki rukom niah kali bad ruh ban burom lang ia kiwei ki kali kiba iaid ba ieng ha u surok bah ban lait na ki jingjia ba sngewsih ne ka jingshah pynthut bad ka jingshah daiñ kuna katkum ki kyndon ain”, ong u Bah Massar.