Hiar jurip ka Committee ka Iing Dorbar ia ki karkhana ha Industrial Area Umiam bad ka pham ri syiar sorkar

Ka Committee on Government Assurances jong ka iing dorbar thawaiñ ka jylla hynne ka sngi ka la leit jurip ia ki karkhana ha Industrial Area ha Ri Bhoi District. Ia kane ka jingjurip la ïalam da u Chairman ka Committee u Bah Renikton Lyngdoh Tongkhar ha ryngkat ka jingdonlang ki dkhot kiba dei ki MLA kynthup ia u Dr Celestine Lyngdoh, u Bah Matthew B Kurbah bad u Bah Ollan Sing Suin.Ka Committee ka la leit jngoh ïa ka Poultry Feed Manufacturing Unit bad ka RNB Cement Plant Ltd ba don ha Industrial Area bad ka jaka ri syiar ka Sorkar Jylla ha Kyrdemkulai. Haba iakren hadien jong ka jingwan jurip, u Bah Renikton Lyngdoh Tongkhar ula ong, “Ngi la sdang ia ka jingjurip ka jong ngi ha ka por mynstep ha Barapani, ha kaba ngi la leit ban jurip ia ka Poultry Feed Manufacturing Unit bad ka RNB Cement Plant ha Umiam Industrial Area. Hadien kane, ngi lah leit sha ka Government Poultry Farm ha Kyrdemkulai.

Ngi dap da ka jingsngewhun ban iohi ia ka jinglong jingman kaba la pynneh ha ka Government Poultry Farm kaba ia ryngkat bad ki farm jong ki riewshimet. Ka Poultry Feed Manufacturing Unit kala treikam la bun phew snem da ka jingshemphang bad ka long kaba ai mynsiem ban iohi ba ka farm jong ka sorkar ruh kala lah ban pynneh ia la ka kyrdan katba nang iaid ki snem”. Kane ka farm ka la don ia ki lad pynmih bun ia ki nongrep bad ki nongseng kam da kaba ai jinghikai sha ki samla kynthup ia ki samla ba la nang la stad ki bym lah ban ioh kam sorkar.

 “Ka rep ka riang ka ai ia kiba bun ki lad bad ka don ia ka jingdawa hapoh ka jylla bad ngi pynshlur ia ki samla ba kin shim ia kane kum ka lad ban kamai jakpoh. Ngi kyntu ruh ia ka tnad Animal Husbandry & Veterinary ban pyniar ia ka farm ym tang namar ba ka don ka jingdawa hynrei ban thaw shuh shuh ia ki lad aikam ai jam. Ka rukom pynneh ia ka farm ka long kaba hap ban ai jingiaroh bad ngi ngeit ba kan iai bteng ban don ia katei ka kyrdan” ula ong. Ha katei ka jingjurip la iadonlang ki Doctor bad ki ophisar jong ka tnad Animal Husbandry & Veterinary Department ryngkat bad ki nongtrei jongka Meghalaya Legislative Assembly Secretariat.