Hiar jurip u Myntri ia ka jingshna surok Shillong-Dawki, lap ba shah pynjulor ki jaka rep

U Symbud Myntri Rangbah ka Jylla u Bah Prestone Tynsong hynne ka sngi ula leit jurip ia ka jingshna ia ka surok na Jingkieng Umshyrpi shaduh Dawki bad ula pynpaw ka jingbynniaw ba shah pynjulor ki jaka rep bad ula bthah ban khmih bniah ia ka jinglut jingsep baroh bad ban siew bai lutksan sha ki trai jaka bad sha ki nongrep. Kane ka jingjurip ka la sdang na ka jingkieng Umshyrpi, ha kaba u Bah Prestone Tynsong ula bthah ia ka kompani, kontraktor, bor pyniaid district, ki heh ophisar sorkar bad na ka NHIDCL ba ki dei ban shimkhia ia ki jingeh kaba mih na ka jingpyniaid ia ki Pipe Um khnang ba yn ioh ban shna pyndep noh ia kane ka projek ban pynsuk ia ka leit ka wan jong ki paidbah. Hadien kane ula leit ban jurip ia ka jaka ha 101 Area bad la sakhi ia ka jinglong jingman ha ka jingshna ia ka surok bad u Bah Prestone ula bthah, ba dei ban sdang noh ban pyniasoh ia ki pipe um kaba sah sa 170 mitar bad ban pyndep ia ka jingpynkynriah ia ki post elektrik hapoh jong une u bnai bad u kontraktor ula kular ban shna pyndep ia ka surok hapoh ka 31 tarik mynta u bnai.

U Bah Prestone ula ong, la ioh ruh ia ka jingkular ban pyndep noh ia kitei ki bynta, khnang ba ki paidbah kin iohi noh ba lah dep nadong shadong ia ka surok Four Lane hapoh ka 31 tarik mynta u bnai. Nalor kane ula leit ruh ban jurip ia ka jingshna ia ka surok ha ka thain Pasham ha kaba ula shem ba kala don ka jingshah pynjulor jong ki jaka rep, ha kaba ki trai shnong bad ki nongialam shnong kila kynnoh ba ka kompani kaba pyntrei ia ka surok kala pyntuid ia ka khyndew bad ia ki maw sha ki bri kwai bad tympew ha ka por mynmiet. Halor kane ka jingujor bad ka jingsakhi da la ki jong ki khmat ia katei ka jaka, u Bah Prestone ula ong “Nga lah bthah ia ka bor pyniaid district bad ia ka SDO Civil ban leh ia ka sorjamin ryngkat bad ka jingkhmih bniah ia ka jinglong jingman jong ka jingjot jingpra jong ki marrep jong ki paidbah. Nga lah iohi myntan da la ki jong ki khmat hynrei ki kompani kila ong ba kadei ka jingtwa, ngam i dei ba kan long kumta, teng teng, phi lah sngewthuh hi ki kompani bad ki kontraktor ki kwah ban dep kloi bad kham iohnong na kata ka daw ka jia kumto”.

“Nga lah aiti ha i SDO Civil ryngkat bad u BDO ba kin peit bniah ia kane bad ia ka jingduh jong ki nongrep. Ngi lah maham ruh mynne ba kim bit shuh ban pynthuid ia ka khyndew ne ia ki maw sha ki jaka rep jaka riang ha ka jingiaid jong kane ka surok na ka Package 5. Nga lah bthah ba kin leh ia ka sorjamin ryngkat bad ka jingkhmih bniah ia ka jinglut jingsep jong ka jingshah pynjulor ki trai jaka bad ki jaka rep bad khamtam haba nga lah iohi ia ka jingduh ka jongki ia u kwai bad tympew bad kiwei kiwei ki jingthung jingtep” la ong u Bah Prestone.U Symbud Myntri Rangbah ula iathuh ruh ba halro ka jingshna iaka jingkieng, ki kam ki jam kila sdang ban tih ia ka ‘Foundation’ ha ki bynta kiba hap ha ka Shnong Nongpdeng bad nangne pat kan poi sha ki bynta kiba shadien jong ka Shnong Umsyiem. Ula ong, ba la bthah ia ki kompani bad kontyraktor ba kidei ban pynsted noh ia ki kam ki jam baroh bad ban pynbun shuh shuh ia ki nongtrei khnang ba yn lah ban pyndep ia kane ka projek ha ka por kaba la buh.