Hiar ka Peace Committee ban pynbeit ia ka jingiakynad ha ka shnong Maikhuli

Shisngi hadien ba ka la don ka jingkhihwin bad ka jingshah ktah ka shongsuk shongshngaiñ ha ka shnong Maikhuli, Ri Bhoi District ka shnong ba markhap bad ka Assam, na ka liang ki nongmihkhmat ba dei peit ia ka Peace Committee jong ka Meghalaya bad Assam ki la lah ban pynbeit noh ia ki jingiakynad bad ruh ban iasoi ia ka soskular hapdeng ki nongshong shnong ka liang Assam bad Maikhuli lyngba ka jingialang kaba la long ha ka 2 tarik u Nohprah ha ka shnong Maikhuli. Lah ban kdew, ba ha miet jong ka 30 tarik Naiwieng la kynnoh ba la don katto katne ngut ki briew na ka liang Assam kiba la leit ban pyndam ia ki jingthoh na u maw ba la tei ban pynpaw ia ka jingtei ia ka skhim MGREGA jong ka shnong Maikhuli kaba don ha ka pung ri dohkha jong kane ka shnong tad haduh ba ka la mih ka jingiakynad bad ka jingiashoh  hapdeng ki nongshong shnong ka Maikhuli bad  jong ka liang ka Assam, ha kaba na ka liang ki bor ka Meghalaya bad Assam ki la phah syndon da ki pulit bad Majistor ban pahara ha katei ka shnong ban tem ia kano kano ka jingiaumsnam.

Halor katei ka jingjia, kaba la pynshongsyier ia ki nongshong shnong ka Maikhuli, na ka liang u MLA ka Jirang Constituency u ba dei ruh u Myntri ka sorkar jylla u Bah Sosthenes Sohtun u la shimkhia marmar ban bthah ia ki bor pyniaid district Ri Bhoi lem bad ki bor pulit ban pynbeit noh mardor ia katei ka jingiakynad khnang ban iada na kino kino ki jingjia kiba sngewsih, ha kaba marmar ki bor ba dei khmieh ia ka Peace Committee jong baroh ar ki jylla ki la hiar ban pynbeit ia kane ka jingiakynad. Ia kane ka jingiakren pyniasuk hapdeng ki nongshong shnong ka Maikhuli bad ka liang Assam, lyngba ka peace committee la lamkhmat da u Bah Eric Dkhar, Magistrate na Ri Bhoi District katba na Assam la mihkhmat da u Topash Saikia, u Nicholas Marak, Rangbah Shnong Maikhuli, ki kynhun Sengbhalang na Meghalaya bad Assam, kumjuh bad baroh ki nongshong shnong na Maikhuli. Shuh shuh ruh, lyngba kane ka jingialang ban ia pynbeit halor ki kynrum ki kynram kiba la ktah ia ka shongsuk shongshngaiñ tang namar ka jingdon jong ki nongshimkabu ban wanrah ia ka jingiasngew pher jingmut bad ka jingiakynad hapdeng ki nongshong shnong ha khappud ka Meghalaya bad Assam, na ka liang ki nongmih jong ka peace committee ki la rai ban phah ia soi da ka soskular hapdeng ki nongshong shnong bad nongialam shnong ban pyntikna ba kum kine ki jingjia kin ym jia shuh nangne shakhmat.

Nalor ka jingiasoi soskular ban pynneh ia ka shongsuk shongshngaiñ, ha kane ka jingialang la ailad ruh ban pynieng biang ia u post ilektrik u ba la shah pynkhyllem ha ki katto katne bnai ba la leit noh bad ruh ban thoh biang ia ki dak ha u mawnongrim ban pynpaw ia ka jingtei lyngba ka skhim MGREGA ha u mawnongrim ba la shah pyndam ha ki riew shimkabu ia u ba la tei hajan ka pung ri dohkha jong ka shnong Maikhuli. Na ka liang u Bah Sosthenes Sohtun, u ba dei u MLA ka Jirang Constituency bad ruh u Myntri jong ka sorkar jylla, mar ia ioh jingtip halor kane ka jingjia iakynad kaba la mih hapdeng ki nongshong shnong ki Shnong khappud ka Meghalaya bad Assam ha ka shnong Maikhuli, kum u nongmihkhmat u la shimkhia ban iakren bad u Myntri Rangbah ka jylla Meghalaya u Conrad K Sangma ha kaba la bthah ia ki Deputy Commisioner jong baroh ar jylla ban pynbeit mardor halor ki kynrum kynram kiba lah ban ktah ia ka shongsuk shongshngaiñ jong ki paidbah ha kitei ki Shnong khappud.