Hiar shuki CEM u bah Shemborlang, mynta lah ban jied CEM thymmai KHADC

U Chief Executive Member (CEM) ka Khasi Hills Autonomous District Council (KHADC) u Bah Shemborlang Rynjah uba dei u MDC ka Langkyrdem-Laitkroh hynne ka sngi ula hiar shuki noh kum u CEM ka KHADC. Ia kane la pynthikna da u Executive Member (EM) ka KHADC u Bah Powel Sohkhlet. Kane ka jingwan hiar shuki noh u CEM ka long tang hadien 7 bnai ba shimti ka VPP ban synshar ia ka Executive Committee jong ka Council. Ha ka shithi sha u Chairman ka KHADC u Bah Strongpillar Kharjana, u Bah Shemborlang ula ong ba ka daw ban pynlong ia u ban hiar shuki noh kum u CEM ka dei namar ba u um don ha ka met ba koit ba khiah.

“Hadien ba la bishar bniah nga la shim ia ka rai ba namar ba ngam don ha ka met kaba koit ba khiah bad na ka bynta ka bha ka miat jong nga shimet bad jong ka Ophis, nga la rai ban hiar shuki noh na ka kam CEM jong ka KHADC” la ong u Bah Shemborlang ha ka shithi sha u Chairman ka KHADC. Haba kren sha ki lad pathai khubor u Powell ula ong ba u CEM ula aiti ia ka shithi iehnoh kam sha u Chairman jong ka KHADC Bah Strong Pillar Kharjana ha ba pyntip ba ka dei na ka daw ba um don hapdeng ka met kaba koit ba khiah. Namar kane ka jingjia, u Bah Powell u pyntip ba ka Parliamentary Party jong ka VPP kan sa shong jingialang shen ban shim rai halor ka elekshon ban jied CEM ba thymmai ka KHADC.

“Wat lada ngim sngewlah pdiang ia kane ka jinghiar shuki jong i, hynrei haba ngi pyrkhat pat ia ka koit ka khiah, ngi la pdiang bad burom ia kane ka rai jong i ryngkat ka jingduwai bad kitbok kitrwiang ba in ioh noh ia ka met ba koit ba khiah” ong u Bah Powell. Kawei pat ka tyllong khubor ka iathuh ba ka jingjied CEM thymmai ha KHADC ka lah ban long mynta ka sngi 25 tarik Nailur.