Hiar shuki u Biren Singh kum u Myntri Rangbah hadien ar snem ka jingiaum snam

U Myntri Rangbah ka jylla Manipur, u N Biren Singh ula ai shithi iehnoh kam kum u Myntri Rangbah sha u Lat ka Jylla, u Ajay Kumar Bhalla ha Raj Bhavan hynne ka Sngi U Blei hadien ar snem kynthih ka jingiaum snam hapoh ka jylla Manipur. Kane ka jia hadien katto kane kynta ba ula wan phai na Delhi. Ia u Singh la synran lang da 14 ngut ki MLA na ka seng BJP bad NPF ryngkat u State president BJP u A Sharda bad u nongialam ba rangbah u Sambit Patra.Ha ka shithi sha u Lat u Singh ula ong, “Ka la long ka burom ban shakri ia ki paidbah ka Manipur haduh mynta. Nga sngewnguh shibun ia ka sorkar pdeng na bynta ki jingiarap ki kam pynroi bad ka

jingpyntreikam ia ki projek bapher na bynta ka jingmyntoi ki paidbah Manipuri.” Ha ka sngi Saitjain, u Singh ula khot ia ka jingialang ki MLA ka kynhun synshar ba la ialam da ka BJP ha halor ka dorbar ka ban sdang lashai ka sngi ka 10 tarik Rymphang. Ia katei ka jingialang la pynlong hadien ba ka liang pyrshah ka Congress kan wanrah ia ka jingtyrwa bym shaniah shuh ne no-confidence ia ka sorkar ba la ialam da u Singh.U Myntri Rangbah ka Jylla Manipur, ula leit sha Delhi ha ka janmiet Sngi Saitjain da ka liengsuiñ sorkar, ong ki heh sorkar hynrei ym tip ka jingthmu jong u ban leit sha nongbah Delhi.

La iathuh mynshwa ha katei ka sngi, u Singh u la khot ia ka jingialang bad ki MLA ka kynhun synshar ba la ialam da ka BJP ban iakren halor dorbar ka ban long la shai sngi.Ha ka jingialang la don 20 ngut ki MLA, halor ka jing thmu ka liangpyrshah ka Congress ban rah ia ka motion bym don jingshaniah shuh pyrshah ia ka sorkar ba ialam u Singh.