Hun jrut ki nongdie madan ha ka jingïalang bad CEO, sa 40 ngut kin ioh CoV

Ka kynhun hapoh ka shatri jong ka Shillong  Roadside Hawkers’ Association (SRHA) hynne ka sngi ka la pynpaw ka jingsngewhun ia ka jingialang ba la khot da u CEO ka Shillong Municipal Board (SMB) u PK Boro.Ia kane ka jingialang jong ka Provisional Town Vending Committee (PVTC) ka SMB la khot ban iakren halor ka bha ka miat ki nongdie madan ha kylleng ka sor Shillong.Ha kane ka jingialang la donlang ki dkhot ka Meghalaya and Greater Shillong Progressive Hawkers and Street Vendors Association (MGSPHSVA) bad ka Shillong Roadside Hawkers’ Association (SRHA).Haba kren sha ki lad pathai khubor hadien ka jingialang ka President jong ka SRHA ka Kong T Nongbri ka la pynpaw ia ka jingsngew tynnad halor kane ka jingialang ba la khot da u CEO ka SMB.

Ka Kong Nongbri ka la iathuh ba na ka liang u CEO ula pynthikna ban khot biang ia ka jingialang khnang ban iakren sani halor ka jingthmu ban pynkynriah lut ia baroh kiba shong die jingdie madan ha ki surok bad rud surok ka nongbah Shillong.Naka liang u Bah E Chen uba dei u Dkhot ka PTVC u la iathuh ba mynta ka rai ba mih na kane ka jingiakynduh lang ka long ban leh na bynta jingiasuk lang baroh kiba shongdie madan.U Bah Chen ula pyntip ba ki dang don kumba 30-40 ngut ki nongshong dukan madan ha ka thain Khyndailad ki ban sa ioh ia ki CoV.

Ula ong ba ka PTVC ka la phah ia ki kot ki sla ba donkam sha ka Shillong Municipal Board (SMB) ha kaba dei ka bor ban ai ia ki CoV.“Ngi kwah ban iatreilang bad ka Sorkar ban pynthikna ia ka khuid ka suba ka sor Shillong” la ong u Bah Chen.Ula iathuh ruh ba kito ki bym pat ioh ia ka COV kin dang iai iakren bad na ka liang u CEO ka SMB un sa khot biang ia ka jingialang jong ka PTVC ha kine ki sngi ban wan.