Ia kynduh ka FKJGP ia u GM ka NHIDCL, dawa pynkloi ka jingshna surok Four Lane

Ka Federation of Khasi Jaiñtia and Garo People (FKJGP) Upper Shillong Circle hynne ka sngi, ka la leit iakynduh ia u General Manager jong ka NHIDCL bad dawa ban pynsted ia ka jingshna ia ka surok Four Lane naduh Umshyrpi ban pynsuk ia ka leit ka wan ki paidbah. Ka seng FKJGP hapoh ka jingialam jong u President ka FKJGP Upper Shillong Circle Samla Kitboklang Nongphlang ryngkat bad u President ka FKJGP Mawñianglah Unit u Samla Hopewell Kharkongngor, u President ka FKJGP Pomlum Unit u Samla Donkupar Nongdhar, President ka FKJGP Bañiun Unit u Samla Bantei Nongkhlaw bad ki dkhot ka seng ha ka jingiakynduh ia u General Manager ka NHIDCL ki la dawa ba ki kompani bapher bapher kiba pyntrei ia ka surok Four Lane naduh Umshyrpi ter ter ki dei ban pynsted noh ia ka kam khnang ba kan ym ktah ia ka leit ka wan jong ki paidbah kiba iaid na katei ka surok bah bad na ka liang jong u General Manager ka NHIDCL ula pynthikna ba kin pyrshang ban pyndep noh ia ka jingtrei ha ki bynta jong ka thaiñ Upper Shillong ha u bnai Nohprah 2025 lane ha u Kyllalyngkot 2026.

 “Ka FKJGP Upper Shillong Circle ka la dawa ruh ba ki kompani/kontraktor ki dei ban maramot kloi ia ki katto katne ki bynta ba la ktah ia ka leit ka wan jong ki paidbah lyngba ka jingdheng kali ba shyrkhei khamtam ha ki sngi Nyngkong, sngi Thohdieng bad sngi Saitjaiñ kaba la pynsyrtok ia ki nongleit nongwan khamtam ki bynta ka Umshyrpi haduh Ladlummawbah, ha Sawmer hajan Sunny Site, ha Mawklot bad lad Lum Shyllong, ha 7mer hajan Elephant Falls, ha Pomlum hajan ka PHC bad kumjuh ruh ki bynta jong ka shnong Bañiun ban leit sha Mylliem” la pynpaw u Information Secretary ka FKJGP, Upper Shillong Circle u samla Kenny Kurkalang ha ka kyrwoh khubor. Ula ong, ba ka seng kala shimkhia ban kren ia katei ka bynta namar lyngba ka jingdheng kali kaba shyrkhei khlem pep kan sa ktah ia kiba bun ki samla pule kiban sa ialeh ia ki Examination bapher bapher ha kine ki khyndiat bnai kiban sa wan. “U General Manager ka NHIDCL ula ai ka jingkular hakhmat ki nongialam jong ka seng ba un sa btah mardor ia ki kompani/kontraktor ba kin leh ia kaba donkam bad ba kin sa pynlong ruh ia ka jingleit jurip ha ryngkat ki nongialam jong ka seng khnang ba kan pynsuk iaka leit ka wan jong ki paidbah” la pynpaw u samla Kenny bad ka bynrap ba ka seng kala dawa ruh na u General Manager jong ka NHIDCL ban bthah ia ki kompani/kontraktor ban pyntikna ba ki nongtrei bylla kiba dei ki bar jylla ba kidei ban pynbiang iaki kot ki sla kiba biang bad ba dei ban pyrkhing namar ba ym lah ban tip ba ioh lehse  ki mynder kiba la shah kyndang na ka jylla Assam kin ioh ban riehtngen bad ban sah duh ha ka thaiñ Upper Shillong ha ka dur jong ki nong bylla sngi bad halor kane, na ka liang jong u General Manager ka NHIDCL ula kular ban ai ka jingiatreilang bad ka seng khnang ba kan ym don satia kano kano ka jingdkoh jongka kam ban pyntrei ia katei ka surok bah.

Ka seng ka kyntu ruh ia ki Dorbar Shnong ba kin long kiba peitngor bha bad kumjuh ruh ban ai ka jingiatreilang bad ka seng ha kaba iadei bad ka jingwan buhai shnong jong ki briew kiba nabar bad kumjuh ruh ban tehlakam ia ki kam sniew kiba la sdang ban kynrei ha ka thaiñ naduh ki kam tuh kam thiem bad kumjuh ruh ban pyrkhing ia ka jingjyllei jong u Droks ym tang ha ka thaiñ hynrei ha ka Bri u Hynñiewtrep bad ha ka jylla hi baroh kawei bad ka kyntu jur ruh ia ki paidbah nongshong shnong jong ka thaiñ ba kidei ban long kiba phikir bad ban mih shakhmat ban ai ka jingiatreilang bad ka seng ban pynneh ia ka shongsuk shong shngaiñ ha ka thaiñ baroh kawei.