Iaid Rally ka HBDRF ha Jowai, dawa pynphai ia ka Block I-II sha Meghalaya

Ha ka rally bad jingialang paidbah ba khot pynlong da ka seng Hynñiewtrep Border Dispute Redressal Forum (HBDRF) ha Jowai ha ka sngi saitjaiñ halor ka nongrim ban pynsngew sha ka sorkar ia ki jingeh jingjynjar ki briew ba sah ha ki thaiñ khappud Meghalaya Assam, la sakhi da ki spah ngut ki paidbah ki la wan shim bynta kynthup naduh ki nongialam sengbhalang, ki riew pawkhmat, ki riew khraw pyrkhat bad khamtam eh ki paidbah ba bun na ka thaiñ khappud lem bad ki nongialam shnong jong ki. Nyngkong ki la sdang da ka jingiaid rally na lad College Kiang Nangbah ter ter ka surok bah ha ryngkat ka jingpyrta dawa pynphai biang ia ka Block-I bad Block-II na Assam sha Meghalaya, bad ia kane ka rally la pynkut da ka jingialang ha District Library Mynthong Jowai. Ha ka jingialang ha Mynthong District Library ki nongkren ba la ai jingkren ki la pynkynmaw ia ki jingeh jingjynjar ba ki briew ka thaiñ khappud ki mad na ka por sha ka por bad ruh ki la pashat ia ki jingmut ba dei ban leh nangne shakhmat.

Ha kane ka jingialang la mih ruh ka jingiakren halor ka jingdon ki briew ba khanglad bad maham ia ki paidbah ba don sha ka thaiñ khappud hynne ka step ha ka por ba ki thmu leit shim bynta sha kane ka rally. Halor kane ka jingshah maham u bah Arwin Sutnga haba ai jingkren ula kyntu ia ki paidbah ka thaiñ khappud ba kim dei ban tieng hynrei ban iaid beit shakhmat ha ka lynti ka hok bad jingshisha bad ma u ruh un don ryngkat bad ki. U kular ruh da kaba ong, “Shwa ba ngan leit na kane ka pyrthei nga kwah ban ieh ka jingsuk haphi namar lada ym wan ka jingsuk ka durkhmat jong ka pateng ka jaitbynriew jong ngi kan kut noh”.  Kumta u kyntu ia ki paidbah ka thaiñ khappud ba kin sngewbha ban long iatylli, namar u iohi u tip ba la don ka jingiapait politik bad ka kam border ruh ka la kylla politik haduh kata kata.

Haba wer ia ka seng Hynñiewtrep Border Dispute Redressal Forum kumjuh kiwei pat ki seng ban mih shakhmat na ka bynta ban iaid shakhmat halor ka jingeh ki paidbah ha ki thaiñ khappud, u ong ha u la don lut ki kot ki sla ki sakhi ban pynshisha haba ia dei bad ki rai ka sorkar ba mynshwa. Da kaba kular ruh ba un donlang ryngkat halor kane ka mat. U ong ruh ba u don ka map jong ki jaka puta naduh u snem 1779 ba la dep certified da ka United Khasi Hills District Council 1950.