Iaid Rally ki sengbhalang ryngkat khynnah skul ban pyrshah ia ka Industrial Estate ha CTI

Ki paidbah nongshong shnong jong ki lai tylli ki Shnong ba kynthup ia ka Umpher 12 Mer, Amphanggre bad ka Matchokkgre lyngba ka JAC Ri Bhoi District mynta ka sngi ki la mih ban iaid paidbah ban pynpaw ia ka jingpyrshah kaba jur halor ka jingthmu ka sorkar jylla ban pynkynriah noh ia ka Conservation Training Institute (CTI) jong ka Soil and Water Conservation sha Mawkhanu bad ban pynkylla pat ia katei ka jaka sha ka Industrial Estate, da kaba kynnoh ruh ba ia kane ka kam la shu leh sopsop khlem ka jingpyntip paidbah. Ha kane ka jingiaid paidbah, la wan ban ai jingkyrshan ba rad da ki nongialam sengbhalang ba kynthup ia ka KSU, FKJGP bad RBYF, Byrnihat Citizens Forum, Garo Students Union, Ri-Bhoi Regional Unit, Byrnihat Women Society, ki khynnah skul ka St. Jude Secondary School bad ka CTI, ha kaba la sdang ia ka jingiaid paidbah naduh ka shnong Umpher terter shaduh ka pyllaw ophis jong ka CTI.

Kumba la sakhi, ki paidbah ki la rah da ki jingthoh placard ban pynrem bad ban pynpaw ia ka jingpyrshah kaba jur ia kane ka jingthmu ban pynkylla ia ka CTI sha ka jaka pynmih ia ki karkhana ban shimti da ka Invest Meghalaya Authority, da kaba pynpaw ruh ba ngim kwah shuh ban shah pynbam jaboh shuh nalor ba ka Byrnihat ka la ioh ia ka nam kum ka thaiñ kaba jaboh tam hapoh ka ri India. Kumba la pynpaw ruh, da ki nongialam ba ka jingthmu ban pynkylla ia ka spah akar ka jaka ba don ka CTI sha ka jaka pynieng karkhana kan ktah shikatdei namar ka dei ka khlaw kaba bsa umbam umdih ia ki palat 3000 ngut ki nongshong shnong bad kan ktah shikatdei ia ka jingkhuid jingsuba jong ka mariang.

Ki la pynpaw ruh, ia ka jingsngewkhia kaba jur ba ia kane ka jingthmu ban pynkynriah noh ia ka CTI la shu leh sopsop khlem da pyntip paidbah  Hadien ka jingiaid paidbah, la pynlong ruh da ka jingialang ba la shimbynta da ki nongialam ka JAC bad ki sengbhalang ban ia tai sani halor kane ka jingpyrshah ia ka jingthmu kaba sopsop jong ka Sorkar jylla ban pynrem ruh ia u Myntri Rangbah ka jylla, ha kaba la shim ruh ia rai ban leit kynduh biang ia u Myntri Rangbah ban ia kren halor katei ka jingthmu pynkynriah ia ka CTI.