Iaid shakhmat ka jingpynkhreh Synod ha Balang Sakwang

U MLA ka Mawkyrwat, Bah Renikton L. Tongkhar ha ka 13 tarik Naiwieng, 2024 u la lum lang ia ki ophisar na ki tnat treikam bapher bapher jong ka Sorkar Jylla ban iamir jingmut halor ka jingpyntrei ia ki kam pynroi bapher bapher hapoh ka shnong Sakwang bad ki shnong ba marjan kum shi bynta ban pynkhreh ia ka jingwan ka Jingiaseng Synod jong ka Khasi-Jaintia Presbyterian Synod Sepngi, kaban long ha ki tarik 6-9 u Lber, 2025 ha ka Balang Presbyterian Sakwang, South West Khasi Hills district. Haba kren ha ki lad pahai khubor, u Bah Renik u la pynpaw ka jingsngew kmen halor ka jingiaid beit iaid ryntih jong ka jingpynkhreh ia katei ka Jingiaseng Synod ha baroh ki liang baroh, bad u la ai ka jingiaroh kyrpang ia ka tnat PWD kaba la pynkylla dur ia ka shnong Sakwang baroh kawei bad kumjuh ia ka shnong Pynden Sakwang. U Bah Renik u la ai jingiaroh ruh ia ka tnat PHE namar ka jingpyntrei ban pynpoi ia ka umbam umdih ka la iaid shakhmat watla ki don katto katne ki bym pat dep hynrei u kyrmen skhem ba kin pyndep ha ka por kaba biang.

U la iathuh ruh ba ki don ki jingtrei kiba la nang trei noh katba ym pat ioh ia ka mang pisa na ka sorkar namar ka jingkyrkieh jong ka kam, hynrei u don pat ka jingkyrmen ba na ka liang jong ka sorkar kan sa mang pisa noh kloi ia kitei ki jingtrei khnang ba kan long kaba jop. Ha kajuh ka por, u MLA ka Mawkyrwat u la iathuh ruh ba haba khein kyllum lang ia baroh ki jingtrei na ka bynta kane ka jingpynkhreh ia ka Jingiaseng Synod, ka jingiaid jong ki kam ki jam ka la poi kumba 70-80%, bad kumta u la pynpaw ia ka jingkyrmen ba ia ki jingtrei kiba sah yn lah ban pyndep ha ka por kaba biang. Ha kaba ïadei bad ki jaka ïeng kali, u Bah Renik u la iathuh ba ka la jingtrei ka la iaid shakhmat  khnang kiba wan jingïaseng kin ioh ïa ka jaka ïeng ïeng kali kiba biang khamtam eh ki jaka rung bad ki jaka mih. “Ngi sngewtynnad ban pynkynmaw ïa ka jingiaseng Synod ha Jakrem ha kaba na ka liang jong ki tnat sorkar ki la shimkhia bha ha kaba kam shym la don ka jingdheng kali kumba ju jia ha man la ki jingiaseng heh. Kumta nga kyrmen ba kane ka jingïaseng Synod ha Sakwang kan lait na ka jingdheng bad sahkut kali namar ka jingdon ïa ki surok kiba biang,” ong u Bah Renik.

Na ka liang jong u Poland Sohphoh, Chairman jong ka Rikhain Lyngdoh Sakwang, ka kynhun ba long trai ia ka jaka ka puta ha ka thain Sakwang, u la ong ba ka Rikhain Lyngdoh Sakwang ka pdiang sngewbha ia baroh ki kam pynroi ba la wanrah da u MLA ka thain kum shi bynta ban pynkhreh ia ka jingwan jong ka Jingiaseng Synod ha Sakwang. Hynrei u la kyntu ia ki kontraktor kiba trei ia ki projek bapher bapher ba kidei ban trei bha ia ki jingtrei ym ban shu trei malu mala namar ba ka Synod kan kut noh ha ka 9 tarik u Lber, 2024 hynrei ki kam pynroi kin neh junom kaba long ruh ka jingkyrkhu ia ki paidbah ka thain.