Iakhih ka NEIR ban wanrah ka jingiatylli ki jylla ka thain

Ka North East Integration Rally (NEIR) 2026 ka la pynlong ia ka jingialang ha ka sngi Thohdieng ban sdang ka jingiakhih ban pynkhlain ia ka kolshor bad ia ka jingiadei ba iajan hapdeng ki jylla ka thain shatei lam mihngi. Ha kane ka jingialang jong ka NEIR 2026 la wan ban iashim bynta da ki heh ki hain, ki nongthaw ia ki polisi treikam, ki dkhot ka imlang sahlang ba la iawan lang ban wanrah ia ka mynsiem jingiatylli ka thain baroh kawei. U Myntri ka kam jngohkai ka jylla u Timothy D. Shira ula iaroh ia kane ka kynhun ba la sdang ia katei ka sienjam ban pynlong ia ka prokram kaba don jingmut da ka jingiohi jngai ki nongialam.

“Ka long kaba kongsan ia baroh ban iatreilang ban wanrah ia ka kiew shaphrang ha ka roi ka par ha ka thain lammihngi” ula ong bad ula iaroh ia ka jingtrei shitom u nongseng ka KRC Foundation u Biswadeep Gupta uba la pynwan dur ban lamkhmat  ia katei ka sienjam. U Myntri ula ban jur ka long ba donkam saindur ia ka sap ka phong ki paidbah ka thain shatei lammihngi bad ban kyntiew ia ka thain baroh kawei. Katba u MLA bad u Patron jong ka NEIR u Bah A.L. Hek, ula kitbok ia kine ki nongpyniaid ba ka jingthmu ka jong ki kan long kaba seisoh bad pynpaw ia ka jingkongsan ban don ia kum kane ka ‘Movement’ ban tei ia ka jingiasngewthuh jingmut bad jingiajan hapdeng ki jylla ka thain shatei lammihngi.

Kiwei kiwei kiba la ai jingkren ki kynthup ia u Joydeep Gupta u co-chairman ka FICCI Assam State Council, u Prof. (Dr.) Sukamal Deb bad u Col. Shanti Singh (Retd) bad u Biswadeep Gupta. Ha kane ka sngi, ka la don ruh ka jingpyninam ia ka kolshor bad la ioh ruh ia ka theme song ka NEIR ba la rwai da u K. Bobin na Imphal ba la ioh ia ka jingiaroh na baroh ba la wan sha ka jingialang.Ka North East Integration Rally, ka dei ba la pynkhreh ban pynlong ha u Kyllalyngkot, 2026 da ka jingthmu ban shakri bad ban long kawei ka rynsan ban pyniatylli ban rakhe ia ki jingdon jingem ki longshwa mynshwa ban kyntiew ia ka jingiadei hapdeng ki jylla bad ban pynpaw ia ki jingangnud jong ka thain baroh kawei.