Ïakynduh ki Nongthoh Khubor na Karnataka bad ki MDC halor ka rukom synshar ki ADC

Ka kynhun ki nongthoh khubor na Karnataka mynta ka sngi ki kynduh ia ki MDC jong ka Khasi Hills Autonomous District Council (KHADC) ban iakren bad iamir jingmut ban sngewthuh kham bniah ia ka rukom synshar tynrai, ka rukom pyniaid kam bad ki sien jam ban kyntiew ia ka roi ka par. Kane ka long kum shibynta ka Press Tour ba la pynlong da ka Press Information Bureau (PIB), ka Sorkar India sha Meghalaya. Ïa ka jingïalang la pynïaid da u Bah Strong Kharjana, Chairman ka KHADC, ki heh ophisar bad ki dkhot ka Council ba ia donlang kynthup u Bah Powell Sohkhlet, Executive Member, Information Technology, etc, Bah Seibor Warbah, Executive Member, Finance, Bah Denzil Chen, Executive Member, Elaka, Kong Deiti Majaw, Executive Member, Law) bad Bah D.G. Syiemiong, Secretary ka Executive Committee.

Ha jingïakren ki dkhot ka KHADC ki la batai halor ka bor synshar bad ka jingkitkhlieh jong ka Autonomous District Council kaba treikam hapoh ka Sixth Schedule jong ka Riti Synshar ka Ri India. Ki la batai kumno ka KHADC ka don ka bynta ba kongsan ban pynneh pynsah ïa ki riti dustur bad ka kolshor jong ka jaidbynriew Khasi, ha kajuh ka por ka pynbeit ïa ki jingdonkam ha ka liang ka synshar khadar bad ka roi ka par jong ka thaiñ.

Ki dkhot jong ka Council ki la batai bniah halor ki bynta bapher jong ka synshar khadar, kynthup ka jingtreikam ki bor shnong, ka jingpynïaid ïa ki Elaka, ka jingpyntreikam ïa ki riti dustur bad ki rukom pynïaid ïa ka khyndew ka shyiap bad ki jingdon jingem. La ban jur ia ka jingdonkam jong ka jingiashim bynta ki paidbah bad ka jingshim rai kaba pynshong nongrim da ka jingiasngewthuh jingmut ban pynneh ia ka jingiatylli ha ka imlang sahlang bad ka jingsynshar kaba treikam ha ki shnong.

La iakren ruh ki mat ba iadei bad ka jingpyniaid ia ka kam pisa tyngka, ki kyndon ain, ka jingpyndonkam ia ka information technology ha ka jingsynshar bad ki lad ban kyntiew ia ka Council ha ka roi ka par. Ki la kren shaphang ki sienjam kiba dang iaid shakhmat ban pynkhlain ia ka bor treikam jong ki tnat treikam ban pynbha ia ka jingai jingshakri bad ban weng ia ki jingeh bad ka roi ka par ryngkat ka jingiada ia ki hok ki trai ri trai muluk bad ban pynneh ia ka mariang.

Ka kynhun ka la iakren bad ki nongïalam ka KHADC ban wad jingshai ia ka rukom synshar da lade bad ka jingïadei jong ka ha ka synshar khadar ha kane ka juk mynta.

Na kane ka jingakynduh ki nongthoh khubor ki jingsngewthuh kaba kordor shaphang ka rukom synshar ba kyrpang jong ka Meghalaya kaba pynïasohlang ïa ki riti dustur kiba la rim bad ki rukom synshar ba mynta.

Ki nongthoh khubor ki la pynpaw ka jingsngewnguh ban ioh iakren markhmat bad ki nongïalam ka KHADC bad kane kan ïarap ban pyni ïa ki jingshisha shaphang ka jingsynshar bad ka kolshor ka Meghalaya sha ki briew jong ka ri.

Ka Press Tour sha Meghalaya ka dang bteng ban ai ïa ki nongthoh khubor ïa ka jingsngewthuh shaphang ka kolshor, ka jingsynshar bad ka jinglong ka roi ka par jong ka Jylla, kaba kyntiew ïa ka jingsngewthuh kaba kham bha lyngba ka kam pathai khubor kiba don ka jingkitkhlieh.