Ïakynduh u Comingone ïa u Myntri sorkar pdeng ban pynbiang marbam ha Meghalaya

U Myntri ka tnad Food Civil Supplies & Consumer Affairs u Bah Comingone Ymbon ula leit iakynduh ia u Myntri Ka Sorkar Pdeng uba khmih ia ka Ministry of Consumer Affairs, Food & Public Distribution u Pralhad Joshi, ha nongbah Delhi ha kaba ula pynsngew ia ki sienjam kiba kongsan na ka bynta ban pyndap pynbiang ia ki marbam mardih bad ban pynbha ia ka rukom ai jingshakri ha ka jingsam ha ka jylla Meghalaya. Ha katei ka jingïakynduh, u Bah Ymbon ula ban jur ïa ka jingthmu ka Sorkar Jylla ban pyntreikam hok ïa ka National Food Security Act (NFSA) bad ula pyntip halor ki jingpyrshang ban pynthikna ïa ka jingsam ryntih ïa ki marbam sha ki nongïoh jingmyntoi ha kylleng ka jylla, watla ha ka jylla ki don ki jaka kiba don ha ki jaka kiba long riat bad ka jingjngai jingiar ha ki jaka shong jaka sah. Katkum ka  kyrwoh na ka Tnad Food Civil Supplies & Consumer Affairs ka Sorkar Meghalaya kala pyntip ba u Myntri ula batai bniah ba kumno ka jylla ka pynbeit ia ki jingduna ha ka jingpynbiang, ban pynkhlain ia ki lad ban pynbeit ia ki jingeh bad ban pynthikna ba ki jingmyntoi jong ka NFSA kin poi sha ki longiing kiba jynjar bha.

U Bah Ymbon ula batai ruh ïa ka jingpdiang jong ka Jylla ia ka jingpyndonkam  ia ki kor teknoloji ban pynbha ïa ka jingtreikam ha ka jingsam ia ki marbam paidbah ne Public Distribution System (PDS). U la pynpaw ruh ïa ka jingïatreilang ka jylla Meghalaya bad ka United Nations World Food Programme (UNWFP) bad kila pynleit jingmut ha kaban pynthymmai ia ka PDS, ban pynduna ia ka jingpyn sepei ia ki marbam bad ban pynbha ha ka jingpynmih ia ki jingbam kiba tei ia ka jylla bad ula pynsngew ruh halor ka jingkylla jong kane ka jingiatreilang, kiba la pynbha ia ka rukom sam ia ki marbam bad kyntiew kaba neh ha ka jingsam ia ki marbam mardih sha ki paidbah. U Bah Ymbon ula pynsngew ruh ia ki lad ki lynti kiba har rukom kiba la shim da ka sorkar jylla ban kyntiew ia ka jingkhuid jingsuba ha kajingsam ia ki marbam mardih bad ula pyntip ba la pyndonkam ia ki kor digital kiba kynthup ia ka Aadhaar-enabled services, e-POS devices bad real-time monitoring systems, kiba la pynthikna ba kitei ki jingdon jingem kidei kiba la pyndonkam thikna bad ka jingmyntoi ka poi sha kiba dei ban ioh jingmyntoi.

U Pralhad Joshi ula ïaroh ïa ka rukom treikam jong ka Meghalaya ban weng ïa ki jingeh ba kyrpang jongka bad ai ruh ka jingïaroh ïa ka Sorkar Jylla kaba la pdiang ïa ki lad ki lynti kiba thymmai bad ka jingpyndonkam ia ki kor teknoloji. U Myntri ka Sorkar Pdeng ula pynthikna ia ka jylla Meghalaya ba ka Sorkar Pdeng kan bteng ban ai iaka jingkyrshan ha kaban pynbha ia ka jingpynbiang ia ka bam bad ban kyntiew ia ka bha ka miat jong ki nongshong shnong. Ha katei ka jingiakynduh ia u Myntri ka Sorkar Pdeng la synrna ia u Bah Comingone Ymbon da u Commissioner & Secretary u Pravin Bakshi bad ki heh ophisar jongka United Nations World Food Programme.