Ialap ka JNC pyrshah ia 7 ngut ki MLA lada ym pynsangeh wanrah lynti rel

Ka East Jaiñtia National Council (EJNC) mynta ka sngi 06/03/2025 kala pynlong iaka jingmih paidbah iaid rally ha Khliehriat, East Jaiñtia Hills ban pyrshah iaka jingthmu wanrah lynti rel ha Rilum Jaiñtia.  Ha kane ka jingiamih paidbah la shim bynta ruh daki sengbhalang bapher bapher kynthup ka FKJGP, JNC, MPUF bad kiwei, kiba la rah ryngkat ki lama ïong bad pyrta ki kyntien beiñ iaka sorkar, nangta ki pyrta dawa ruh iaka Government College ha East Jaiñtia Hills bad kiwei. La sakhi ruh ba katba dang iaid ka jingmih paidbah, ki dukan jong ki bar jylla ha lynter u surok bah ruh kila ialeh ban khang. Ia ka jingiaiaid paidbah la pynkut daka jingialang hajan ka ophis u Deputy Commissioner ka East Jaiñtia Hills District, Khliehriat  ba pyniaid da u W. Suting. U T. Darnei Secretary ka All Biate Student Association haba kren ula ai khublei iaka JNC kaba pynlong ia kane ka jingiamih  paidbah ban pyrshah iaka jingthmu wanrah lynti rel namar bala bun ki jaka bala wan jurip ka sorkar ha thaiñ Saipung.

Kiwei pat kiba kren kynthup u Oswald Nampui uba long u President ka JYF-Saipung Circle, nangta u President ka FKJGP- Khliehriat Circle,u Michal Chyrmang, u Kyrshan Blah  President ka MPUF – East Jaiñtia Hills, ka Bythygrace Dkhar President ka Meghalaya Indigenous Women’s Council, u President ka JNC, u Sambormi Lyngdoh bad kiwei haba pynpaw jingpyrshah iaka jingthmu wanrah lynti rel kila kdew ruh iaki nongrim bad ki daw ba lah ban ktah iaka rukom im ki briew ka thaiñ lada ymdon ka aiñ ba biang ban iada. Ki kyntu ba dei ban peit shwa iaki jaka ai jingsumar ha Khliehriat ba ka dang don shibun ki jingduna, ym ban wanrah lynti rel namar ka jingmyntoi kan dei tang iaki karkhana khyndew bilat. U President ka JNC, u Sambormi Lyngdoh u ong, kaba syier mynta ka long ba ioh lehse ki paidbah kin shah pynbeij ha ka dur jong ka Land Compensation, kumta donkam ban leit  pynsngewthuh paidbah sha Saipung halor kane namar ba ka sorkar ka thmu ban wanrah lynti rel naka thaiñ Saipung kaba don khapud bad ka Jylla Assam.

Ula buh jingkylli ruh ba don ei ei sha lyndet ka jingthmu ka sorkar wat haba la don lypa kiwei ki mat jingdawa ba sahteng, namar naka bynta ka lynti rel ka sorkar ka sted bha bad kane ka lah ban dei ba ka shah pynbor ha ki karkhana khyndew-bilat. U ong ruh wat haba ym pat don lynti rel katne jyllei ki bar Jylla, katno tam lada poi lynti rel, ka jylla ka lah ban long kum ka Tripura. Shuh shuh u bynrap ba lada ym pynsangeh iaka jingthmu wanrah lynti rel, naka liang ka EJNC kan sa ialap pyrshah iaki 7 ngut ki MLA ba mynta ha Rilum Jaiñtia.