Ialum ki nongrep ha Nongshillong ban sngap ïa ka jingkren u Modi na Delhi

Ha ka 11 tarik u Risaw, 2025 katba u Myntri Rangbahduh ka ri India, u Narendra Modi u dang plie ïa ki projek bad ki skhim kiba shongdor palat 42,000 klur ha ka rep ka riang bad ki bynta ba ïa dei bad ka rep ka riang na ka National Agriculture Science Complex, New Delhi, kumba 202 ngut ki nongrep ki la ialun hapoh ka KVK ha Nongshillong ban sngap ïa ka jingkren jong u Myntri Rangbahduh ka Ri lyngba ka prokram ba la pyni paidbah ha kylleng ka ri.
Ia kane ka jingïalang la pynlong da ka ophis ka Krishi Vigyan Kendra (KVK), West Khasi Hills, hapoh ka jingïalam ka kong V. J. Lyngdoh, Senior Scientist and Head, ki nongrep ki la ïoh ruh ïa ka jingpynshai na ka Joint Director of Agriculture ka kong M. Dkhar halor ka Scheme Prime Minister Dhan- Dhaanya Krishi Yojana ba la plie da u Myntri Rangbah duh ka ri ha kane ka sngi, kaba thmu ban pynkylla ïa ka rep ka riang ha kylleng ki 100 tylli ki district ba la jied ha ka ri ban kyntiew ïa ki rukom treikam kiba neh, ki buit thymmai bad ka jingpynmih mar kaba kham bha.
Ha kane ka jingialang u MDC ka Pariong-Mawthadraishan konstitwensi, u bah Powell Sohkhlet ula long u kongsan bad ula kyntu ïa ki nongrep ba kin pyndonkam hok ïa ki skhim sorkar da ka jingkitkhieh. Ula kyntu ruh ïa ki nongrep ha ba ki rep kim dei ban shu rep tang ban bam ïalade hynrei ki dei ban rep haduh ban da ïoh ban die sha ïew sha hat khnang ba kane kan long ka lad kamai na ka bynta jong ki bad lyngba kata ki lah ban kyrshan skul ïa ki khun nalor kiwei pat ki jingpyndonkam.