Iamir jingmut u Syiem Raid Marwet bad nongialam shnong ban peitngor ia ki mynder ba shah beh na Assam

Ban tehlakam bad ban peitngor bha ha ki shnong ki thaw kiba don ha khappud bad ka jylla Assam hapoh ka Raid Marwet mynta ka sngi u Paiem ka Raid u Paiem Ken Syiem u la khot bad lum da ka jingialang hapdeng ki nongialam shnong, ki nongkitkam shnong, ki bor pulit ban iatai halor ki lad ki lynti ban iada na ka jingioh rung kyrthep ki mynder ri shapoh ki Shnong ki thaw.Lah ban kdew ruh, ba ka jingshimkhia jong u Paiem ka Raid Marwet ban ia phylliew halor ki lad ki lynti ban iada ia ka jingioh rung kyrthep ki mynder ri ka dei ruh hadien ba sorkar jylla Assam ka dang iai kyndang napang ia ki mynder ri kiba shong ba sah beain ha Assam, kumta kine ki mynder ri ki lah ban bsuh pat sha ki Shnong ki thaw kiba don ha khappud bad ka Assam.

Ha kane ka jingialang, nalor ki Rangbah Shnong ki nongialam shnong, la wan ban ai mynsiem bad ai jingmut ruh da u MLA ka Jirang Constituency u Bah Sosthenes Sohtun, ki heh pulit na Khanapara Police Station bad kiwei kiwei.Haba kren bad ki Nongthoh Khubor, u Paiem Ken Syiem u la pynpaw ia ka jingkmen kaba khraw halor ka jingialong ryntieh jong baroh ki nongialam shnong kiba la kloi ban wan ia shimbynta ha kane ka jingialang kaba la long kaba seisoh kumba la thmu namar ka jingiatai bad phylliew jingmut halor ki lad ban iada na ka jingwan rung kyrthep ki mynder ri bad ruh ki lad ban peit ia ka shongsuk shongshngain hapoh ki Shnong ki thaw kiba don hapoh u pud u sam jong ka Raid Marwet kaba dei ruh ka thain ba don markhap bad u pud u sam bad ka Assam.

“Ka jingthmu ba kongsan jong kane ka jingialang bad ki nongialam shnong ka long ban iamir jingmut halor ki lad ki lynti ban iada ia ki Shnong ki thaw na ka jingwan bsuh ki mynder ri kiba shah beh na Assam kumta la donkam kyrkieh ban pynmih ia ki lad ki lynti ban iada na kane, bad ka jingiatreilang bad ki bor pulit kan iarap shikatdei”, ong u Paiem Ken Syiem.