Ïarap ai kam ka phlim ‘Baa Baa Black Sheep’ haduh 2000 ngut

Ka jingwan ring dur ia ka Phlim Telegu kaba la ai kyrteng ‘Baa Baa Black Sheep’ ka la iarap ban aikam haduh 2000 ngut ki samla ka jylla. Kane kadei ka phlim ba nyngkong eh hapoh ka Meghalaya Film Tourism Policy,2025 kaba la lah ban pyndep ia ka jingring dur kaba 100% ha kane ka jylla. Ia kane ka phlim la pynwandur da u Guni Manchikanti bad pynmih da ka Chitralayam Studios bad tang 25 sngi la lah ban pyndep ia ka jingring ia ka phlim ha kylleng ki jaka jong ka jylla Meghalaya kynthup ha Sohra bad ha nongbah Shillong.

U Myntri Rangbah ka jylla u Conrad K Sangma, ula ong ba kane kadei ka phlim ba nyngkong eh hapoh ka Meghalaya Film Policy kaba lah ban pyndep ia ka jingdur ba pura ha kane ka jylla. “ Nga sngewkmen bad nga kyrmen ba nangne shakhmat kin nang don shuh shuh kiban wan ringdur ia ka phlim bad lyngba kane ka phlim ka jylla Meghalaya kan long ruh kawei na ki jaka kaba paw bad  kan iarap ruh ban kyntiew ia ka ioh ka kot ha ka jylla,”la ong u Conrad. Katba u Venu Donepudi ula ai ka jingiaroh ia ka jingkyrshan ba la ai da ka sorkar bad ka jingdon kane ka polisi ka la lah ban iarap ban pyndep ia ka projek ha ka por ba biang.

Ula ong, “ Ka long ka jingsngewtynnad ba hapoh ka jingialam u Myntri Rangbah bad ryngkat ka jingiatreilang ki paidbah ka jylla, ngi la lah ban pyndep ia kane ka phlim tang hapoh 25 sngi bad kan long ruh ka rekod iangi. Kane ka phlim yn pyllait paidbah ruh ha khasi bad ngi kwah ban khot sngewbha iaphi sha ka jingpyi nyngkong ia kane ka phlim ha Hyderabad.”