Iaroh u Lat ia ki kam ka Riti Academy ban pynshlur ia ki samla donsap

Ka Riti Academy hynne ka sngi Sngi ka sam Khusnam sha ki samla jong ka jylla ha iingpaki dulan jong u Lat ha kaba san ngut ki riewpawkhmat ki la ioh pdiang ia ki khusnam na u Lat ka Jylla u C H Vijayashankar kum u kongsan.Ha kane ka jingai khusnam la iadonlang u Bah F R Kharkongor Principal Secretary, ka Arts and Culture bad u Dr BDR Tiwari, u Commisioner bad Secretary jong u Lat ka jylla. U Lat ula iaroh ia ki kam jong ka Riti Academy na ka bynta ban pynkup burom ia ki samla ka jylla kiba tbit ha la ka sap ka phong, khnang ba kin ioh mynsiem ban dang iaineh ha la ka kam kaba ki tbit. Ula maham ba ki kam sniew kum u droks, ka shongkha khynnah bad ka jingpang HIV kiba la kynrei ha ka imlang sahlang dei ban pynduh pyndam da ki kam babha ban kyntiew ia ki samla ha la ki sap ki phong, khang ba kin lah ban kiar na ki kam sniew.

Ki 5 ngut kiba la ioh khusnam na u Lat ki long u Dr Mebanlamphang Lyngdoh da ka Khusnam Rana Kharkongor na ka bynta ka surrwai surtem bad ka thoh ka tar, Rangkitbok C Dohkrut da ka Khusnam S Quotient Sumer na ka bynta ka thoh ka tar, Kyrmenlang Uriah da ka Khusnam Sumar Sing Sawian na ka bynta ka pathai khubor, Ram Kymjiñ da ka Khusnam Prithpal Sing Sehdeve na ka bynta ka shtahdur bad Ricky Paul Marweiñ da ka Khusnam Crystal Gayle Kharnaior na ka bynta ka thohdur saiñkor (Digital Arts). U Bah Raphael Warjri ula iaroh ia u synñiang jong ki khlur kiba la khlad noh ki ba la pyrsad mynsiem bad pynshlur ia ki samla ha ka lawei kum u Bah S Quotient Sumer, Sumar Sing Sawian, Prithpal Singh Sehdave, Rana Kharkongor bad ka samla Crystal Gayle Kharnaior (bam kwai ha dwar U Blei) kiba la tyngshaiñ ha la ka kam.

Nalor kane ula pynpaw ruh ia ka jingsngewlem ia u Lat barim ka jylla u Satyapal Malik uba la khlad noh dang shen, uba la sam ia ka Khusnam Khliehduh ha Jylla (State Award) sha u Bah Raphael Warjri ha u snem 2021 kaba lyngkhuh artat bad ka lyngkhuh laiphewsnem jong ka synjuk ki barikor Khasi, Riti Academy ha kaba u lat Satyapal Malik ula kynpham ba ka sorkar ka dei ban kyrshan borbah ia ki kam bakhraw jong ka Riti Academy. U Bah Raphael Warjri u la nam ruh ia ki kam thohdur ba la iohlad na ka sorkar kum ka ba tei ia u motdur jong u Tirot Sing Syiem ha nongbah Shillong ka jylla Meghalaya, ha Dhaka, Bangladesh bad dang shen u motdur bajrong tam ha jylla ba phah ka HYC ba la tei ha Laitarted, Nongthliew bad kiwei kiwei ki jingtei donnam ha jylla.