Ïaroh u MLA ka Umsning ba kiew ka roi ka par & ïoh ka kot ka Meghalaya

U MLA ka NPP na Umsning Constituency u Dr Celestine Lyngdoh, hynne ka sngi ula iaroh ia ka Sorkar Jylla halor ka jingkiew ka roi ka par bad ka ioh ka kot jong ka jylla Meghalaya.

Haba iashim bynta ha ka sngi balai jong ka Dorbar Mang Tyngka halor ka Governor’s Address u Dr C Lyngdoh ula ong, ba ka Meghalaya ka la wan baar hadien jong ka Tamil Nadu ha kaba ia dei bad ka Development Index bad ka jingroi ha ka ioh ka kot bad ka la long kawei na ki jylla ba la kiew sted bha ha ka roi ka par ha ka ri India.

Ula ong, ba ka ioh ka kot ka la kiew ar shah na ka T.29,508 Klur ha u snem 2018 sha ka T.59,626 Klur ha u 2025 bad ula kdew ruh ia ki jingkynshew tyngka ka sorkar ha ki bynta bapher bapher ha kaba ka la don ka jingkiew kynthup ia ka pule puthi, ka jingshna ia ka surok, ka bording bad ki jingtei ha ki jaka sor bad ka sorkar kala iaid shakhmat ha kaban wanrah ia ki jingkylla ha ka jingim jong ki paitbah.

Ula iathuh ruh ba ha u snem 2023, ula kob ia ka sorkar ban shna ne siang ia ka Artificial Turf ha ka madan ialehaki Football ha Nongpoh bad tang hapoh jong ka 3 bnai la buh ia u mawnongrim.

U Dr Celestine ula ong namar ka jingpynleit jingmut ka sorkar ha ki kam pynroi ka la wanrah ia ka jingbit jingbiang ha ki thain nongkyndong, kynthup ia ka jingshna ia ki surok, ka jingkiew jong ka jingdon ki Self-Help Group bad ki Producer Group bad ka jingdon ki Self-Help Group kala kiew na ka 5,800 ha u snem 2018 sha ka 51,674 ha u 2025.

Nalor kane, ula iaroh ia ka jingshimkhia u Myntri Rangbah da kaba ong, ba udei u nongialam uba kloi ban iaid ryngkat bad ka trei ia ka kam bad ula shimkhia ia ki mat kiba la mad jingeh da ki paitbah jong ka Umsning ha kaba la pyndep ia ka jingbuh ia ki Street Light ha Umsning bad la lah ruh ban pynbeit ha ki katto katne ia ka jingmad jingeh ki paidbah na ka jingkyrduh um.

U MLA ka Umsniong ula ai jingmut ruh ia ka sorkar ba kadei ban leh da kaba tyngeh ia kito kiba donkti ha kaban trei torti ia ki kam namar kane ka pynjot noh ia ka jingkmen jong ka jingioh ia ka surok kaba thymmai bad ula ong ba ka sorkar kadei ban buh rekod ia kum kitei ki kontraktor bad ban pyntip sha ka Sorkar Pdeng ba kan kiar ha kaban ai bun ki kam ia ki.