Iasoi ka NEIGRIHMS bad ka CGHS ban ai jingsumar ei ia ki nongtrei sorkar

Ka North Eastern Indira Gandhi Regional Institute of Health and Medical Sciences (NEIGRIHMS) ka la pyniar ia ki lad sumar hapoh ka skhim jong ka Central Government Health Scheme (CGHS) ha kaba ka NEIGRIHMS ka la soi ia ka Memorandum of Agreement (MoA) bad ka CGHS ha ka 25 tarik u Rymphang 2025, ka long ka jingjop ba kongsan ia ka jaka sumar bad ban ioh ia ki jingsumar ba biang ha ka thain shatei lammihngi ka ri India.

U Prof. (Dr.) Nalin Mehta, Director ka NEIGRIHMS, ula pynpaw ka jingsngewkmen halor kane ka jingïateh kular bad pynpaw ka jingpynrung ïa kane ka hospital ha ka network jong ka CGHS kan ym ai tang ïa ka jingsumar sha ki nongpang kiba bun ha ka thaiñ shatei lammihngi hynrei kan long ruh ka sienjam ban ai ïa ki jingshakri ba kham bha ha ka koit ka khiah baroh kawei. U Dr. Animesh Mishra, Medical Superintendent ka NEIGRIHMS, ula ong kane ka long kum ka histori ba la bun snem ha ka jingpynkhreh. Ula kdew kane ka long kum u mawjam ka jingpyrshang la arphew snem ban pyniasoh ia ka NEIGRIHMS bad ka CGHS bad mynta kan ai jingmyntoi ia bun ki briew shimet ba shaniah ha ka CGHS ban kyrshan ha ka liang ka koit ka khiah.

U Dr. Paokhomang Lengen uba dei u Additional Director ka CGHS Shillong ula pynpaw ki jingmyntoi ba kongsan jong kane ka jingiateh. Ula pynshai ba kane kan ai lad ïa ki nongïoh myntoi na ka CGHS, kynthup ki dkhot ba mynta bad ba barim ka Ïingdorbar Parliament, ki nongïaleh laitluid, ki nongtrei ka CGHS/DGHS/Tnad ka Koit ka Khiah, Ki nongtrei Family Welfare, nongtrei ka Sorkar India, bad kiwei ba don card CGHS kumba la pynmih da ka Sorkar, kin ïoh jingsumar ei khlem donkam siew pisa ha NEIGRIHMS. U Dr. Caleb Harris, Deputy Medical Superintendent bad Nodal Officer ka CGHS ha NEIGRIHMS ula iathuh ba kane ka skhim kan treikam pura ha u bnai Iaiong 2025, kaba ailad ïa ki nongïoh jingmyntoi na ka CGHS ban ïoh ïa ki jingshakri ha ka koit ka khiah khlem jingeh. Ka jingiatreilang kan wanrah ka jingkylla ban pynbha ia ki lad jingsumar pang ia ki briew shimet ha ka thain Shatei Lammihngi ka Ri India pynthikna ban ioh ka jingsumar ba bha tam lyngba ka network CGHS.