Iasoi MoU ka sorkar bad ka BMGF ban kyntiew ka koit ka khiah bad ka rep ka riang

Ka sorkar jylla hynne ka sngi ka iasoi soskular ne Memorandum of Understanding bad ka Bill & Melinda Gates Foundation (BMGF) ban kyntiew ia ka koit ka khiah, ka jingsam ia ki jngbam tei bad ka rep ka riang. Ka thong jong katei ka MoU ka long ban iatreilang hapdeng ka sorkar jylla bad ka BMGF ban kyntiew ia ka koit ka khiah ki paid nongshong shnong ka jylla khamtam kaba ia dei bad ka koit ka khiah ki kmie bad ki khyllung ba dang kha, ka jingpynwan dur ia ka jingdon paid ha ki iing ki sem, ka jinghikai ban ai jingsumar bad ka rep ka riang bad ri ia ki jingri. Ka Meghalaya ka dei ka jylla ba lai hapoh ka ri India, hadien ka Uttar Pradesh & Bihar ban iatreilang bad ka Gates Foundation bad ia ka MoU la iasoi ha ka jingdonlang u Myntri Rangbah ka Jylla u Conrad K Sangma, ka Myntri ka Koit ka Khiah ka jylla ka Dr. M Ampareen Lyngdoh, u Director ka India Country Office ha Gates Foundation u M. Hari Menon, ki ophisar ka sorkar jylla bad na ka BMGF. U Myntri Rangbah ka Jylla u Conrad K. Sangma ula ban jur ka jingdonkam ban iatreilang da kaba ong, “Ngi dap ka jingsngewkmen ba ngin ioh ka jingiatreilang bad ka Gates Foundation. Ngi donkam ban don ia ki briew ba biang bad ka jingthmu ba dei ban ia shong pyrkhat lang ban weng ia ki jingeh, ia ka rukom treikam ha ki tnad bad ki jingthmu kiba ngi don. Ngi dang peit ka jingtbit ha ka jingstad bad shemphang bad kaba kongsan ka long kumno ban pynbha ïa ka jingim jong ki nongshong shnong.”

U la ong, “Ngi la sdang ban pynwandur ia ki jingthmu katkum ki jingeh kiba shisha, ki rukom treikam jong ki tnad bad kaei kaba ngi dei ban leh ban weng ia kitei ki jingeh. Ngin sa iaid tam ia ka lynti iaid ban pynthikna ba ngin ioh ban pynurlomng ia ka thong kaba ngi kwah. Kam dei kaba suk, hynrei kadei ka jingïaid lynti kaban ïai bteng”.Ka Kong Ampareen Lyngdoh, ka la ong, “Ngi dap da ka jingkmen, ba phi la don lypa ha ka lyngkha trei lah bun snem, kumta phi la tip bha ia kiei ki jingduna jong ngi bad ia kaei kaba ngi donkam ban leh. Nga kwah ban iohi ia ka jingiashimbynta jong ka imlang sahlang. Nga kyrmen skhem ba ngin lah ban pynwandur ia karukom treikam kaba biang ha kylleng ha ka thain shatei lammihngi bad kiwei kiwei ki jaka. Nga dang ap khmih lynti ia ka jingsoi ia ka MoU”. Ka MoU kaba la iasoi ka long ban pynurlong ia ki sienjam bad ki lad ai jingsumar kiba biang ha ka jylla bad katei ka kynhun kala ai iaka jingkular ban shim ia kiba bun ki kam ban pynurlong ia ki thong jong ka United Nations Sustainable Development Goals, khamtam hakaba iadei bad ka thong jong ka koit ka khiah kaba dei ban pyndep hapoh u snem 2030. Ka MoU kan neh haduh 4 snem ha kaba baroh kiba donbynta kin plie lad ha kaban lah ban pynurlong ia kitei ki jingthmu kiba la buh ha ka jingthoh da kaba peit, khmih bniah bad ka jingbishar bniah.

Ka jingiatreilang jongka Sorkar Meghalaya bad ka Gates Foundation kadei kaba la pynshong nongrim long halor ki lai tylli ki thong ban wanrah iaka jingkylla ia ka jinglong jingman jong ka koit ka khiah kaba mynta. Kaba nyngkong eh ka long ban ban pynduna ia ka jingiap jong ki kmie, ki khunlung kiba dang shu kha bad ki khynnah lyngba ka jingpynbun ia ka lad ban ioh ia ka jingpynbeit ha ki longiing longsem, ka jingsumar ia ka jingpang Anemia bad ka jingpynwandur ia ki lad ban kit kyrkieh ban pynduna ia ka jingiap. Ka baar, ka jingiatreilang ka thmu ban kyntiew ia ki jingshakri ha ka koit ka khiah bad ka jingbam ia ki jingbam kiba tei kiba ai da ki sorkar bad ki seng treimon sngewbha da kaba phaikhmat kyrpang ia ka jinglong shynrang bad kynthei. Khatduh eh, ka jingiatreilang kan tei ia ka jinglah jong ki jaka treikam ha ki shnong ki thaw da kaba pynthikna ba kin don bynta ha ka jingthaw ia ki polisi treikam, ka jingwad bniah bad ki jingwanrah iaki jingkylla ha ka koit ka khiah bad ban kyrshan ia ka jingkylla kaban neh.U M. Hari Menon, Director jong ka India Country Office & South & Southeast Asia Director, Bill & Melinda Gates Foundation ula ong, “Ka jingïatreilang jong ngi bad ka Sorkar Meghalaya ka pyni iaka jingkitkhlieh ban pynthikna ïa ka jingïoh kaba mar katjuh ha ki jingshakri ha ka koit ka khiah bad ka jingsam ia ki jingbam kiba teit. Ngi khmih lynti ban iatreilang bad ka Sorkar ban pynkhlain ia ka koit ka khiah, ban pynroi ia ka jingpynmih ia kiei kiei kiba thymmai bad ban pynneh ia ka jingpynmih na ka bynta ki paidbah ka Meghalaya”.Ka BMGF kan ai jingkyrshan ha kaba iadei bad ka  ka pisa bad ka jingkyrshan da kaba ai iaka jingshemphang ban pynbha ha ki 12 tylli ki bynta ba kongsan, primary healthcare, family planning, maternal health & anaemia, neonatal health, immunisation, childhood wasting & nutrition, nursing education, supply chain management, digital health, results based financing and performance management in healthcare, competency mapping bad ban kyntiew ia ka rukom treikam jong ki tnad sorkar, ka rep ka riang bad ban kyntiew ia ka kam ri ia ki jingri.