Iatreilang ki pulit bad Nongthoh Khubor ban pyniaid kali ha Ri Bhoi

Ki pulit ka Ri Bhoi District hynne ka sngi la ia treilang ryngkat ki Nongthoh Khubor ban pyniaid kali ha surok bah National Highway 06 ha Umsning By-pass ban hikai ia ki nongñiah kali khamtam ki kali heh kum ki trok ban iaid katkum ki kyndon aiñ ne Traffic Rules ba ki dei beit ban iaid na ka liang ka diang ban pynsuk ia kiwei ki kali rit ban jam shakhmat bad ban lait na kino kino ki jingjia takhuh kali.Ia kane ka program ai jinghikai ne exercise la lamkhmat hi da u Senior Superintendent of Police ka Ri Bhoi District u Vivekananda Singh Rathore ha ka jingiadonlang u Additional Superintendent of Police Incharge Traffic u Bah Orville Massar, U Incharge ka Umsning Police Station u Kamrul Islam, u Incharge ka Traffic Branch Nongpoh u Rubul Ali nalor kiwei kiwei ki heh officer.

La sakhi ba ki pulit ki la pynshai ia ki nongñiah kali kumno ban iaid na ka liang ka diang ban pynsuk ia kiwei pat ki kali, nangta la pyniaid ruh na ka liang ka diang bad kumjuh ban iaid kawei sha kawei ka liang kaba la pynsngewthuh kumno ka buh jingeh ia ki kali ban jam shakhmat bad kaba lah ruh ban buh jingma ia ka iaid ka ieng jong kiwei pat ki kali kiba bud nadien.Haba kren bad ki Nongthoh Khubor, u SSP VS Rathore u la iathuh, ba ka jingbteng hi jong ki pulit ka district ban iai ai jinghikai ia ki nongñiah kali kumno ban burom ia ka traffic rules bad ka jingburom ia kiwei ki kali ka long ban nang iada ia ki jingjia aksiden kiba shyrkhei kiba la iai jia ha kane ka district ha kaba bun ki mynsiem briew ki la duh noh, kaba ju jia tang namar ka jingpynher sted bad ka jingdih buaid.

Ula ong ruh, ba haduh mynta naduh ba la sdang ban ai jinghikai, ka rukom iaid rukom ieng ki kali ha u surok bah NH 06 ka la don ka jingkylla shibun ha kaba ki nongñiah kali ki la sdang ban sngewthuh bad bud thik ia ki kyndon ain, wat la ka dang donkam shibun ia ka tnad pulit ban nang bteng ban ai jinghikai, da kaba bynrap ruh, ba wat ka jingdheng kali ha ki bynta na Byrnihat sha Jorabat ka la jia tang namar ka jingpynieng pathar ia ki kali ruh ka la don ka jingkylla kaba khraw hadien ka jingai jinghikai bad ka jingkhynra kaba man ka khyllipmat da ki bor pulit.Shuh shuh ruh, u la ong ba ka jinghikai ha kaba ia dei bad ka rukom niah kali, ka tnad pulit ka la phaikhmat ruh sha ki nongñiah kali jong ki pulit bad ki heh sorkar lane ki VIP’s naduh ki Escort ki Pulot bad kiwei kiwei namar ka aiñ ka treikam lang ia baroh ym tang ia ki riew paidbah, u la bynrap.