Ioh biang u bah Seibor ka Finance, u Powel ka Development, u Denzil R Chen Ilaka

U Chief Executive Member (CEM) ka Khasi Hill Autonomous District Council (KHADC) u Bah Winston Tony Lyngdoh ula iathuh hadien u Lat ka Jylla ula ai ka jingmynjur ia ki dkhot jong ka Executive Committee (EC) bathymmai jong ka KHADC. Haba kren sha ki lad pathai khubor u CEM ka KHADC u Bah Winston la iathuh ka Executive Committee (EC) bathymmai ka KHADC kynthup ia u CEM u Bah Winston Tony Lyngdoh ryngkat bad 7 ngut ki Executive Member (EM). Ha ka jingbate kam u CEM ia ki EM bathymmai, u Bah Winston Tony Lyngdoh kum u CEM un bat hi ia ka tnat General Administration, Appointment, Posting & Transfer Establishment, Trade Enforcement, Revenue Collection, Art & Culture, Khasi Traditional Medicine Commission (KTMC) bad kiwei tnad bym pat sha ki EM.

U Bah Powell Sohklet u MDC Mawthadraishan un bat ia ka Land, Development and Information & Technology, u Bah Seiborlang Warbah MDC ka Mawkynrew un bat ia ka tnat Finance, Taxation and Forest. Ka Kong Aibandaplin F. Lyngdoh Nonglait MDC Mylliem Constituency kan bat ia ka Health & Sanitation, Solid Waste Management and Education, ka Kong Deity H Mawjaw MDC ka Laitumkhrah-Malki Constituency kan bat ia ka tnad Law & Legal Matter kynthup ia ka Implementation of Khasi Social Custom of Lineage Act and Rules, Constitutions of Courts, Marriage & Divorce and Town Committees.

U Bah Isynei Hinge u MDC ka Umroi Constituency un bat ia ka tnat Water Resources and Fisheries, u Bah Pynkhrawboklin Kharjahrin MDC ka Mawkyrwat un bat ia ka tnat Council Buildings & Council Assets bad ka Building Bye Laws katba u MDC ka Jaiaw Constituency u Bah Denzil Raynard Chen un bat ia ka tnat Elaka Administration bad Markets.