Ïoh bos skul ka Khliehriat Higher Secondary School

U Myntri Rangbah ka jylla u Conrad K Sangma, hynne ka sngi, ula plie ia ka Hostel ha ka wat kaba nyngkong jongka Ephatha Society, Dkhiah West kaba hap ha East Jaintia Hills District. U Myntri Rangbah ryngkat ka jingdonlang u MLA ka Khliehriat u Bah Kyrmen Shylla kila sam ia ki kali ar shaka ne Two-Wheeler Handicap-Friendly Mobility bad kiwei kiwei ki jingiarap bad ki tiar bad ula iakren ruh bad ki briew kiba don jingduna ha ki dkhot met bad ki dkhot jongka Ephatha Society.

Ha katei ka jingiakren u Myntri Rangbah ula pynshlur ia kiba don jingduna ha ki dkhot met da kaba ong, “Kan ym long man la ka sngi ba phin ioh ia u Myntri Rangbah ban wan ban iakren bad phi, kumta kadei ka kabu ia phi ban pynpaw ia ki jingsngew bad ia ki jingai jingmut bad kaei kaba ka sorkar ka lah ban leh, ban kyrshan ia ki jingangnud ki jong phi” bad ka bynrap, ba kane ka jingai jingmut bad ki jingpynsngew kin dei kiba la mih na kane ka jingiakren kan long kaba kongsna bha na ka bynta ki briew kiba don jingduna ha ki dkhot met hapoh ka jylla. Ula ong, ba yn sa shimkhia ha kaba iadei bad ka jingtei ia ka surok kaban poi sha ka Hostel bad ia kiwei kiwei ki jingdonkam hapoh ka Hostel yn sa ialeh ban shna pyndep noh bad ula ong ba yn sa shimkhia ruh ia ka jingpynpaw da ki dkhot jong ka Society na ka bynta ki kam kiba iadei bad ka jingpyntbit ia ki sap ki phong bad ki kam ban kamai jakpoh bad ia kane yn sa leh ha ka wat ka baar.

Ia ka Ephatha Society la thaw ha ka 2 tarik u Nohprah 2020 da ka mishon ban plie ia ki kabu, ban thaw ia ka jinglong jingman baroh kaba ai jingkyrshan ia ki briew kiba don jingduna ha ki dkhot met. U Myntri Rangbah ula pynkup burom ruh ia kiba don jingduna ha ki dkhot met kiba la leh bha bad paw ha ki bynta ne kam ki bapher bapher. Ha kane kajuh hi ka sngi, u Myntri Rangbah ula leit ruh ban aiti ia ka bos skul kaba la bei tyngka lyngba ka Chief Minister’s Special Development Fund sha ka Khliehriat Higher Secondary School.Hadien ka jingaiti ia katei ka bos kul, u Myntri Rangbah ula iakren ruh bad ki khynnah skul kiba la shim ruh ia ka lad ban kylli jingkylli ha kaba iadei bad ka jinglong jingman jong ka pule puthi ha ka jylla, ka jingkynrei u droks, ka rukom leh ka jongu ha kaba iadei bad ka jingshah kynthoh bad kila pynpaw ruh ia ka jingdonkam ban buh ia ki Digital Library.