Ioh Health Card bad jingiarap 66 ngut kiba duna dkhot ha West Jaintia

Ki 66 ngut ki briew ba don jingduna ha ki bynta bapher bapher ha ka 26 tarik mynta u bnai ki la ioh pdiang da ki tiar ba kyrpang kiba lah ban iarap ia ka jingim ba man ka sngi jong ki, kumjuh ruh ki la ioh pdiang da ka Niramaya Health Insurance cards ha ka jingialang ba la pynlong ha Community Hall Lad Mukhla, ba la pynlong da ka ophis District Social Welfare Officer,  ki bor district ka West Jaiñtia Hills bad ka Composite Regional Centre for Skill Development Rehabilitation Empowerment of Persons with Disabilities (Divyangjan) (CRCSRE, Shillong), Meghalaya. Ki tiar ba la sam ha kane ka sngi kynthup ki shuki (Wheel chair, Motorized Tricycle, CP Chair, Wheel chair Auxiliary crutch), ki hearing aids ne ki tiar ba iarap iaka bor iohsngew, ki diengduh bad kiwei. Ia kine ki tiar la wan ban aiti da u Symbud Myntri ryngbah u Sñiawbhalang Dhar uba la long ruh kum u kongsan ryngkat u Wailadmiki Shylla MLA Jowai uba long ruh u Chairman ka MUDA, haka jingdonlang u Deputy Commissioner West Jaiñtia Hills District u Abhinav Kumanr Singh, u Dr. Ram Shakal Sahani, Director of CRCSRE, Shilong, ka kong Y. Najiar, District Social Welfare Officer bad kiwei.

 Haba ai jingkren u Symbud Myntri Sniawbhalang Dhar ula kyntu iaki briew ba don jingduna ba kin sngewbha ban bud ryntih iaki jingbthah ka sorkar khnang ba kin ym duh iaki jingmyntoi bala mang kyrpang ka sorkar naka bynta jong ki. Ula banjur ruh halor ka jingdonkam ban pynrung kyrteng Aadhaar ialade khnang ban iohpdiang iaki skhim bapher bapher, namar ba ka sorkar ruh ka shimkhia bha ban ai jingkyrshan iaki briew ba don jingduna. U kyntu ruh ban sumar bha ia kine ki tiar bala sam shaki hynne ka sngi. U Wailadmiki Shylla haba pynsngew ia katto katne tylli ki skhim baka sorkar ka ai jingiarap, u ai jingiaroh khamtam halor ka health insurance kaba tip kum ka Niramaya Health Insurance Scheme nabar ka don iaka bynta ba khraw ban iarap haka pang ka shitom ki briew ba don jingduna.

Ula bynrap ruh halor ka jingkordor ka pule puthi khamtam ia kiba don jingduna, namar ba ki suk bha ban ioh kam sorkar naba la don ka bhah kyrpang jong ki hi. U kyntu ruh ia ki nongioh myntoi ha kane ka sngi ba kin  shimkhia wad jingnang jingtip  kumba ki la ioh ia kine ki tiar kiba lah ban iarap ai bor bad ban pynlong laitluid na ki  jingduna ba don ha ki.