Ioh jinghikai 30 ngut ki samla ban thain jain da ka kti

Ka prokram ai jinghikai ba 7 sngi halor ka kam thain jain da ka kti ne “Handmade Woolen Knitting” ba la pynlong da ka Pt. Deen Dayal Upadhyay Community College bad ka Skill Development Centre, Wahiajer ka jaka pule jong ka NEHU ka la sdang 12 haduh 19 tarik Lber, 2025. Ka jingthmu jong ka programme ka long ban pynkhreh ia ki samla ha ka imlang sahlang da ka jingtbit na ka bynta ka ioh ka kot bad ka jingim kaba neh sha khmat.

Ha ki hynniew sngi, 30 ngut ki nongiashim bynta na ki kynhun bapher jong ka imlang sahlang la ai ia ka jinghikai lyngba ka jingpyni kaba treikam bad ki jingialang ba ia dei bad ki. Ki nongshah hikai ki la ioh ia ki jingshemphang bad jingtip ba kordor na ki bynta bapher bapher kiba ia dei bad ka rukon thain jain da da ki kti.

Ha ka sngi pynkut 19 tarik u Lber u bah Reforminson Lamare, MDC ka Wahiajer-Nartiang Constituency ula long u Kongsan bad u bah Lovely Shylla, Ex-Asst. Headman, Wahiajer kum u symbud kongsan ha ka jingialang.

Ha ai jingkren ki la pynpaw ka jinghikai ban pyntbit bad pynjanai ia ki samla ba dang wad kam bad ki la pynshlur ia ki samla ka thain ban trei ia kum kine ki jait kam bad ban pyntbit ia lade kum ki nongtrei khnang ban pyntyllun ia ka jingim ki nongshong shnong ka thain da ki kam thain jain. Ki la ong ruh ba lyngba kine ki jaid kam ka ai lad ia ki ban pynbiang ia ki jingdonkam jong ki longing longsem ha ka liang ka kup ka sem.

Ka Prof. S. M. Sungoh, Principal I/c, DDUCC ha ka jingkren, ka la pynkhih mynsiem ia ki samla bad longkmie jong ka imlang sahlang ha kaba pynrung ia lade ha kum kine ki prokram ai jinghikai ba kongsan katba ki dang pynkhreh ia lade ban long kiba tbit ha ki rukom treikam bapher bapher.

Ka la pynksan ba kum kine ki jait kam ki la jan jah na ki daw bapher bapher, hynrei ka la ai mynsiem ia ki nongiashim bynta ban kit ia ka lyngkor ban iai ialeh ban pynneh ia kum kine ki kam shna ne thain da ki kti khnang ba ka jaidbynriew kan iohi ia ka lawei baphyrnai. Ka la pynshlur ia ki nongiashim bynta ban ieng ha ka ki kjat bad ka pynshlur ia ki ban khein kor ia ka jingtbit bad ban pynneh bad pynjanai lyngba ka jingtrei shitom.

Kane ka jingthmu ka long shibynta ka jingaiti ba kham jylliew jong ka DDUCC/NEHU ban kyntiew ia ka jingnang jingstad bad ka jingroi ha ka kam, kum shi bynta jong ka NEP 2020 bad katkum ka jingthmu jong u (L) Pandit Deen Dayal Upadhay.

Khatduh la sam synod sha ki nongshim bynta bad la ioh ka jingkren ai khublei da u Ma Wolnish Rymbai, Program Co-ordinator uba la ban jur ba lyngba kine ki prokram ai jinghikai ba man ka por ba ka College ka la ioh ia ki jingkyrshan bad ai mynsiem na ki paidbah ha kaba iadei ka jingiarap bad ka jingkyrshan ba la ioh da ki briew ba donkam ban pynkhreh ia lade ha ka por ba ki don ha ka kam. Kane ka la pynlong ia ki ban long kiba la pynkhreh bad ban kyrshan ia ki na ki por sha ki por ban long kiba la pynkhreh na ka bynta ka lawei.