Ioh ka Ranikor 2 tylli ki iing skul na ka skhim sorkar, plie u MLA bah Pius

U MLA ka Ranikor, u Bah Pius Marwein mynta ka sngi u la plie ia ki ar tylli ki iing skul ba la tei thymmai, kata, ka Mawjai Govt. Lower Primary School ha shnong Mawjai kaba hap hapoh Mawkyrwat Block bad ka Nongmluh Govt. Lower Primary School ha shnong Nongmluh kaba hap ha Ranikor Block, South West Khasi Hills District.

Ia kine ki ar tylli ki iing skul la tei ha ka jinglut kaba T.44.79 lak kawei kawei lyngba ka Infrastructure Upgradation Project Phase-II kaba la bei pisa na ka State Scheme jong ka jylla Meghalaya.

Haba kren kum u kongsan, u bah Pius u la iaroh ia ka sorkar MDA hapoh ka jingialam u Conrad Sangma kum u Myntri Rangbah, kaba la shim khia bha ia ka tnat pule puthi bad sdang ia ki projek na ka bynta ban kyntiew kyrdan bad kumjuh ruh ban maramot ia ki skul sorkar.

“Mynta phi lah ban ïohi ïa shibun ki jingkylla ha ka tnat pule puthi. Ka la long kaba pher bak-ly-bak haba ïanujor bad ki khyndiat snem ba la dep ha kaba ïadei bad ki jingtei na ka bynta ki ïing skul bad kumjuh ruh ka jingthung ïa ki nonghikai ba la pyntbit. Ngim kwah ban ïohsngew biang ïa ki jingujor na ki paidbah ba ka sorkar jylla kam shym la leh ei ei na ka bynta ki khynnah skul namar ba ka sorkar ka la pynlut shibun na ka bynta ka tnat pule puthi, kaba long ka lawei jong ka jylla bad ka ri,” ong u Bah Pius.

Haba kren halor ka jinglong jingman jong ki skul sorkar ha Ranikor Constituency, u bah Pius u la ong ba ka jingpynbha ia ka pule puthi ka dei kaba u buh hakhmat eh kum u MLA bad u la kam ba ki la don shibun ki jingkylla ha kine ki lai-saw snem ba la dep ha ka Constituency ha kaba iadei bad ki jingtei ia ki iing skul.

Kiwei pat kiba la ai jingkren ki kynthup ia u Bah D.G.Nongsiej, District School Education Officer & Sub-Divisional School Education Officer jong ka South West Khasi Hills District, Mawkyrwat, u bah G.G. Bung Snaitang, Deputy Chairman ka Meghalaya State Planning Board bad u Bah Kynsai Thongni, Junior Engineer jong ka tnat Pule Puthi, South West Khasi Hills District.