Ioh ka Umdap T.47 klur na ka PMGSY ba shah thngan ka Kong Bindas

Da ka jingkmen bad sngew burom ia ka jinglen lade kawei ka longkmie na bynta ki kam pynroi, ki nongialam ka Joint Action Committee (JAC) jong ka Umdap Area Development Organisation, mynta ka sngi ki la pynkup burom ia ka Kong Binda Syiem, halor ka jingleit shah thngan jong ka hakhmat ka Additional Secretariat ha ki bnai ba la leit na bynta ban dawa pynioh ia u surok ba paka ha ka thaiñ Umden ha Ri Bhoi District. Ia kane ka jingpyndon burom ia ka Kong Bindas Syiem la pynlong ha ka Iingdorbar jong ka Pahammawlein, ha kaba la wan ban ia donlang da u Bah Lawrence Nongrum, Chairman ka JAC, u Bah C.B Syiem, MDC barim ka Nongpoh, u Bah S.W Malai, President ka Nongpoh Block Congress Committee, ki nongialam sengbhalang nalor kiwei kiwei ki riew rangbah ka thaiñ. Lah ban kdew, ba ka Kong Bindas Syiem ka la pynlong da ka jingiakhih ban shah thngan hakhmat ka Additional Secretariat ha nongbah Shillong ban dawa na ka sorkar jylla ba kan mang pisa mardor ban maramot ne shna thymmai ia ki surok kiba la tor bad sniew palat liam ha ka thaiñ Umden kaba la buh jingeh shikatdei ia ka leit ka wan jong ki paidbah nongshong shnong ha kane ka thaiñ, tad haduh ba ka sorkar jylla ka la mang pisa lyngba ka skhim PMGSY phase III ban tei ia u surok na Nongrim Byrnihat sha Umden ba don kumba 38 kilometre ha ka jinglut kaban kot kumba 47.2 klur tyngka.

Haba ai jingkren ha kane ka sngi, ki nongialam ka JAC ki la pynpaw ia ka jingkmen bad ka jingsngewnguh ia ka jinglen lade ka Kong Bindas Syiem kaba khlem da pyrkhat shuh ia la ka jingim ka la kloi ban leit shah thngan na bynta ka jingdonkam jong u paidbah ha kaba ia dei bad ki kam pynroi khamtam u surok u ba dei u budlum jong ka roi ka par bad ban suk ka leit ka wan ka kit ka bah. Ki la pynpaw ruh ia ka jingsngewnguh kaba khraw, ba dei hadien ka jinglen lade jong ka Kong Bindas ba ka sorkar jylla ka la pynlait ia ka skhim ne mang pisa ban shna ia u surok na Nongrim Byrnihat sha Umden ban pynmyntoi ia ki paidbah, ha kaba la ioh jingtip ruh ba ia ka tender la dep ban pynlait lyngba ka tnad PWD, ha kaba kum ki nongialam ki la ai khublei ruh ia ka sorkar jylla bad Myntri ka tnad PWD kiba la kloi ban sngap ia ka jingdonkam jong u paidbah ha kaba ia dei bad u surok.

Na ka liang ka Kong Bindas Syiem, haba ai jingkren ka la pynpaw ia ka jingsngewnguh kaba khraw ia ki nongialam ka JAC ka thaiñ Umdap kiba la kloi ban wan shakhmat ban ai khublei ia ka halor ka jingleit shah thngan jong ka ha Nongbah Shillong, da kaba ai khublei ruh ia ki paidbah kiba la kyrshan ia ka met bad mynsiem ha kane ka jingiakhih tad haduh ban da ioh kheit ia u soh jong ka jingjop. Ka la long, ba kane ka jingmih jong ka sha madan ka long ba kum ka longkmie kaba don ka jingkitkhlieh ymtang ha la iing la sem hynrei na bynta ka bha ka miat bad ka bit ka biang jong ka imlang ka sahlang ka la shim lem ia kane ka jingkitkhlieh ban tynrong na bynta ka jingmyntoi jong u paidbah ban leit shah thngan ha nongbah Shillong.