Ioh khusnam ka Jylla na ka jingtbit thain jain tynrai ha Global Textiles Expo

Ka Tnad Textiles ka jylla ka la ioh khusnam pynneh ia ki rukom thain jain tynrai ne ka Textiles Sustainability Award na ka Confederation of Indian Textile Industries (CITI) ha ka Bharat Tex 2025 Global Textiles Expo, kaba la pynlong da ka Department of Textiles, ha Bharat Mandapam, New Delhi. U Principal Secretary ka Tnad Textiles ka jylla u Bah Frederick Roy Kharkongor ula pdiang ia katei ka ‘Special Award’ na u Myntri khynnah ka sorkar pdeng uba khmih ia ka tnad Textiles u Pabitra Margherita ha ka jingdonlang ki ophisar ka sorkar pdeng, u Chairman ka CITI ha ka sngi pynhap pyrda ia ka Bharat Tex Global Textiles Expo ka Baar.

Kumba la pyntip da ka CITI, ka Textiles Heritage Reviver Award jong ka CITI – Alekh ka dei ka jingai burom ia ki riew shimet bad ia ki kynhun kiba shim ia ki sienjam ban pynkhie im ia ki kam thaiñ bad jingsuh jain tynrai, ban kyntiew bad pynneh pynsah, ka jingpynwan dur thymmai ia ka jingriewspah ha ka kam thain bad jingpynmih ia ki jain kiba naduh ki por hyndai bad ban pynkup bor ia ka imlang sahlang lyngba ka jingnoh synniang lyngba kane ka kam thain bad suhjain. Ha kane ka jingialang, la ioh ruh ia ka jingpyninam na ki jingjop ha kaba iadei bad ka rukom thain bad ka jingsuh ia ki jain tynrai bad ka la don ruh ka Fashion Show ha kaba la pyni kyrpang ia ki riam ki beit ba la pynwan dur kyrpang da ki nongsuh jain ba paw na kylleng ka ri kynthup na Meghalaya.

Nalor ka jingpyninam ia ki sienjam kiba la shim da ka Tand Textiles naduh u snem 2019, ka kynthup lang ruh ia ka jingpynbna paidbah bad ka jingai jingithuh ia ka shnong Umden-Diwon na Ri Bhoi District, Meghalaya kum ka ERI Silk Village kaba nyngkong eh ha u snem 2021, ka jingtei ia ka Design Innovation Research Centre, (DIRC) ha u 2022 bad la pyninam ruh ia ka jingpynmih ia u ksai ryndia, ka jingthir ksai bad thain jain haduh ka jingsuh bad pynwan dur ia ki jain ha ki riam ki beit, ka jingwan peit bad pawnam ka Ryndia bad ka jingshim khia ban ioh ia ka GI Tag. Ka jingbuh ia ka Eri Corner ha ka Megh Tex, ka jingshna ia ka e portal halor ka Ryndia, ka jingpyniaid shakhmat bad ka jingpyntreikam ia ka Integrated Textile Tourism Project ha Nongpoh, ki prokram ai jinghikai ban kyrshan ia ki nongsuh bad ki nongthain jain ban pynwan dur kyrpang ia ki jain bad kiwei.