Ioh kurup ka tnad Customs T.30.17 klur u drok ba wanrah na Myanmar

Ka tnad Customs Preventive, North Eastern Region ha ka jingkhynra ba la pynlong mynta ka sngi ha ki lai tylli ki jaka, ka la ioh kurup drok heroin bad ka Methamphetamine tablet, kaba la kot sha ka T.30.17 klur. Ha ka jingkhynra ka tnad Customs, Silchar ryngkat ka jingiatreilang bad ki BSF ki la ioh bat ia kawei ka kali Mahindra Bolero ha Panibhora ha surok Mizoram–Silchar bad na kane ka kali, la ioh kurup 79 tylli ki song sabon ba kynthup 885.56 gram u suba heroin bad 15 synduk ba khia 15 kg ka dawai tablet methamphetamine. Ka jingshong dor kine ki mar beain ba la ioh kurup ka la kot sha ka T.22.15 klur.

Ha kawei pat ka jingkhynra, ha Teliamura, Agartala, ki briew ka tnad Customs bad ki shipai ka 28 Bn, Assam Rifles, kila bat ia kawei ka ar shaka hajan Bachaibari, ha ka surok Kamalpur-Khowai. Na kane ka ar shaka kaba niah marwei u briew, la ioh kurup 04 packet ba heh ba khia 04.00 kg ka dawai tablet rong saw pink ba la suba ba dei ka Methamphetamine. Ia kine ki mar beain la wanrah na Myanmar lyngba ka Mizoram sha Agartala. Ka jingshong dor kine ki mar beain ka la kot sha kaT. 4.02 klur bad la kem ia une u briew. Ha kawei pat ka jingpynap shrip ha Singerbil, Agartala, ki Customs ryngkat ki CPF, Agartala kila ioh kurup ia ka tablet Amphetamine (Yaba) haduh 4 Kilo, kaba wanrah na Khowai sha Vijaynagar da ar ngut ki briew da ka ar shaka rong iong khlem number. Ki briew ka Customs kila kthong ia kane ka ar shaka kumba 30 minute lyngba ki jaka khlaw shwa ban ioh kurup.

Ia kine ki tablet la suba jur ba thmu ban shalan lyngba ka khappud ka Mizoram-Tripuraka kaba don hajan ka Agartala. Ha ka kyrwoh ka tnad Customs North Eastern Regiong ka la maham ba kan pynjur ia ka jingkhynra nangne shakhmat ia kiba leh ia ki kam khaii beain bad ia ki mar beain bad yn pynshitom katkum ka ain.