Ioh lad ki khynnah skul ka thain Smit ban pynher Drone

Ki khynnah skul ba don ha ka thaiñ Smit ki la ïoh ïa ka lad ban ïohi, ktah bad pyndonkam ïa u drone lyngba ka prokram ba la tip kum ka ‘drone technology’. Ia kane ka program ba la pynlong lyngba ka jingïatrei lang hapdeng ka North East Centre for Technology Application and Reach (NECTAR), ka Department of Geology, St. Anthony’s College bad ka Don Bosco Higher Secondary School, Smit. Kane ka prokram ka plie lad kyrpang ïa ki khynnah skul kiba dei na Smit bad ki shnong ba marjan khamtam kito kiba don ha ka klas 9 bad klas 10 khnang ba kin ïoh jingtip bad ïohi markhmat shaphang ka jingpyndonkam ïa u drone. Baroh ki la don haduh 449 ngut ki khynnah skul kiba wan ban shim bynta ha katei ka prokram na ki 7 tylli ki skul kiba dei na katei ka thain. Kine ki kynthup ïa ka skul Loreto Mary Ward School, Umphyrnai, St. Francis De Sales Secondary School, Lad Nongkrem, Ibasara Secondary School, Iewpomtiah, Mount Gerizim Secondary School, Smit, St. Peter Secondary School, Smit bad kumjuh ka Don Bosco Higher Secondary School, Smit.

Ha kane ka jingïalang la ïoh ruh ïa ka jingkren maitphang na u Principal ka Don Bosco Higher Secondary School, Smit, (Dr.) Albert Longley Dkhar SDB uba la pynpaw ïa ka jingkordor katei ka prokram na ka bynta ki khynnah skul kiba dang khie bad kiba dang thrang ban ïohi ïa kiei kiei kiba thymmai. Naka liang u Director General ka NECTAR, Dr Arun Kumar Sarma u la ong ba ka mat ba dei bad u drone kadei ka phang kaba la iaid bha ha baroh ki liang bad kumta u la banjur ïa ka jingdonkam ban don shuh shuh kham bun ki kabu ïa ki skul ba kin tip kham bniah shaphang kane.Ha ka technical session u drone pilot na ka NECTAR, u Nitin Sharma u la batai kham bniah shuh shuh shaphang ka drone technology bad ka jingpyndonkam ïa ki ha kiba bun ki liang. La ïohi ruh ïa ki khynnah ba ki kmen ban ïohi kumno la pyndait, pynher bad khamtam kumno ban tehlakam ïa u drone.

Nangta la batai bniah ruh ïa kiba bun ki jingmyntoi kiba lah ban leh lyngba u drone katkum kane ka juk stad technology mynta. La pynshai ruh ba ki don bun ki kyndon kiba iadei bad u drone khamtam ban da ïoh jingbit ha shwa ban pynher ïa u sha suin bad kiba kumno kiba la lah ban pynher ïa u nalor kiwei kiwei ki kyndon kiba bun. Kiba bun ki khynnah skul ki la pynpaw ruh ïa ka jingthrang ban ïoh jingtip kham bniah shuh shuh shaphang katei ka jinghikai kaba la pynkmen ruh ïa ki bor pynïaid khamtam ïa ka NECTAR. Kane ka prokram ka la long ruh kum ka jingbuh dak ïa kiba bun ki khynnah ban don ïa ka thong, ba ha kawei ka sngi ki ruh kin sa ïoh ban pule bad tip kham bha shuh shuh shaphang kine ki kor ki bor ka juk stad mynta ha ki jingpule kiba kham shajrong.