Ioh lum kuna T.18 hajar ki pulit na ki draibar ba pynkhein ‘Traffic Rules’

Ki bor pulit ka Ri Bhoi District, mynta ka sngi ki la daiñ kuna ia kito ki nongñiah ia ki kali heh kiba pynkheiñ ia ki kyndon ain jong ka Traffic Rules da kaba pyniaid ia ki kali jong ki ha ka liang ka mon lane right lane ha ka jaka ban bud thik ia ka jingiaid kali kaba dei na ka bynta ka liang ka diang jong u surok bah National Highway. Lah ban kdew, ba ki pulit ka Ri Bhoi District dang shen ki la pynmih ia ka jingmaham pyrshah ia kito ki kali heh kiba kit mar khia ba ki dei ban pyndonkam ia ka liang ka diang jong u surok bah ym ka liang ka mon namar tang na ka daw ka jingpyndonkam jong ki kali heh ia ka liang ka diang mon bun tylli ki jingjia tyngkhuh kali ki la jia ha u ne u surok bah National Highway 06.

Tang hadien katto katne sngi, ba la pynmih ia kane ka jingmaham, ki pulit ki la pynlong ia ka jing peitngor ia ka rukom iaid ki kali heh ha bun tylli ki bynta u surok bah NH-06 ban ai jinghikai ruh ia ki nongñiah kali heh ba kin pyndonkam ia ka liang ka diang haba iaid na u surok bah ban iada na ki jingjia ba sngewsih.

Ha kane ka jingpeitngor ia ka rukom iaid kali, ki pulit ki la daiñ kuna ia kito kiba pynkhein ia ka kyndon ain niah kali bad ka kuna ka la kot sha ka 18000 tyngka, na ka liang ki pulit pyniaid kali ka Nongpoh Traffic Branch ka la kyntu jur ia baroh ki nongñiah kali heh ba kim dei ban pyndonkam ia ka liang ka mon jong u surok bah ban iada na ki jingjia ba sngewsih.