Ïoh mynsiem ka HSPDP ha Nongstoiñ, ba pynïasoh ki nongïalam bad dkhot VPP

Ka Party Hills State People Democratic Party (HSPDP) ka la ioh mynsiem biang hadien ba ki dkhot barim kiba dei ki nongialam naduh ki por jong u Maieit Hopingstone Lyngdoh ( Bam kwai ha Dwar u Blei) kiba la leit pyniasoh mynshwa sha ka VPP, ki la wanphai biang sha la ka Party HSPDP da ka jingthmu ban pynioh biang ia ka jingjop na ka bynta ka Party. Ha katei ka sngi la sakhi ia ki spah ngut ki nongialam na u Unit bapher bapher kynthup ia ki rangbah, ki longkmie bad ki samla ki la wan sha ka jingialang ba la pynlong da ka Party ha Bishop Hall, Nongstoin ha kaba ki la shim ia ka rai ban trei shitrhem ban pynkhlaiñ biang ia ka Party ha Nongstoin.

Ka Party ha katei ka sngi ka la pdiang sngewbha ruh ia u Bah Kwik Lyngdoh uba la iehnoh noh kum u Secretary ka VPP Nongstoin ha ryngkat kiwei pat ki nongkitkam bad dkhot ka VPP kiba la mih noh na ka Party VPP bad wan pyniasoh biang sha ka party HSPDP.

Na ka liang u Bah Kwik u la iathuh halor ka jingiaid lynti jongu hadien ba la pyniasoh bad ka VPP bad u la ong ba ka mynsiem kam shah ba un don ha kiwei ki party bad kane ka la khring biang ia u ban wanphai pat sha ka Party HSPDP. U la ong ba palat 30 snem u la don ha ka Party HSPDP bad u la ju iatrei ha syndah bad u Maieit Hopingstone Lyngdoh, kumta u la rai beit ban wanphai biang sha ka HSPDP la ki pdiang ne kim pdiang ruh bad mynta kane ka la urlong.