Ithuh ka NPYF Amlarem ia ka jingtrei shitom ki samla ha ka SSLC bad HSSLC

Ban ithuh ia ka jingtrei shitom ki khynnah skul haka pule puthi bad ruh ban ai mynsiem haka jingiaid lynti ba shaphrang jong ki, hynne ka sngi ka National People’s Youth Front Meghalaya State Unit lyngba ka NPYF Amlarem Block kala pynkup burom ia 40 ngut ki khun samla ka thaiñ Amlarem, West Jaiñtia Hills District kiba la leh bha haka result SSLC bad HSSLC mynta u snem. Ia kane ka jingialang pynkup burom la pynlong ha Syiem Jingsuk Hall Amlarem, bala donlang u State Working President NPP u Octomewot Lamin, u Block President uba dei ruh u MLA barim ka Amlarem u Stephanson Mukhim, u Bajop Pyngrope Chairman Regional planning and Development Council kum u symbud kongsan katba u Hopeful Bamon MLA barim ka Saipung Sutnga kum u kongsan.

U Bajop Pyngrope haba kren ai mynsiem iaki khun samla u ong, u Blei ula ai ka sap ha uwei pa uwei shong hangi kumno ban trei shitom, u ong ruh ymdei ban klet ba ka Jylla jong ngi ka don shibun ki lad ki kabu ha kaba naka liang ka sorkar ruh kala ialeh ban pynmih shibun ki lad jingiarap iaki khun samla bad nongshong shnong ka Jylla kumno ba kin sdang iaka kam ka jam, khamtam haka juk kyrduh kam kyrduh jam U Kongsan Hopefull Bamon haba kitbok kitrwiang ia kine ki samla u kyntu ruh ba kin nang lehbha shuh shuh shakhmat.Na ka liang u Eladmiki Suting kum u riew shemphang ba ai jingkren kyrpang shaki samla pule haba iadei bad kane ka sngi ai khusnam u ong, “Lyngba ka jinglehbha jong phi ha kane ka result ka pyni ba phi la jam sha kawei pat ka bynta jongka jingim bad ba ki briew ruh kila sdang ban peit shaphi da kawei pat ka dur”.

Ka jingleit skul kaba baroh shi katto mynta la paw ka dor jong ka lyngba ka jingioh pdiang ia kane ka award. U ong ruh kumba ka jingim ka kylla naka jinglong khynnah skul shaka jingpule high skul bad shaka jingim college maphi ruh kiba shah pynkup burom phin sa shah pynkylla haki sngi ki por ban wan. Bad hapdeng kine ki jingkylla u kyntu dei ban ailad ba kan pynkylla iaka kyrdan pule bad im ka jingim ba don akor burom khnang ban lah poi shaka thong. Ha kajuh ka por ula bynrap ruh halor ka jingdonkam ban sumar iaka koit ka khiah.