Ithuh ka tnat pule ia 15 tylli ki skul ha Ri Bhoi ba bud ia ka ToFEI

Ban ai mynsiem bad ruh ban ithuh ia ka jingaiti met bad mynsiem jong ki skul ban bud thik ia ka jingthmu jong ka sorkar pdeng ban pynlait ia ki skul na ki jingdih duma bad ka jingdie ia ki duma, na ka liang ophis jong u Block Mission Coordinator SSA SEMAN Umling Block Resource Centre, Ri Bhoi District mynta ka 16 tarik Iaiong ki la pynkup burom ia ki 15 tylli ki skul kumjuh ia ka BMC Umling Block kaba la poi ha ka kyrdan ba hajrong eh ha ba ia dei bad ka jingtreikam ia katei ka thong katkum ka “Tobacco-Free Educational Institution” (ToFEI).

Ia kane ka Tobacco Free Educational Institution ka dei ka thong jong ka sorkar pdeng ban pynlong ia ki shlem ai jingstad ban lait na ka jingpyndonkam ia u duma ne kiwei kiwei ki jingdih, jingbam (tobacco) bad ka jingpyrkhing ruh ia ka jingdie ia kine ki jingdih duma hajan ki kyrpong jong ki skul bad ban pynshlur na bynta ka jingkoit jingkhiah jong ki khynnah pule. U MLA ka Nongpoh Constituency u Bah Mayral Born Syiem u la shimbynta kum u kongsan ban sam ia ki khusnam ha ka jingiadonlang ruh ka Ruby Z Das Joint Director District School Education Officer, ka kong K B Jyrwa, DSEO lem bad kiwei kiwei. Haba kren ha kane ka sngi, u Bah Mayral Born Syiem u la pynpaw ia ka jingkmen kaba khraw ban sakhi ia ka jingiashimbynta kaba shitrhem jong ki skul bapher bapher ban pynurlong ia katei ka thong jong ka sorkar pdeng ban pynshlur ia ki jinghikai ia ki khynnah ha kaba ia dei bad ka koit ka khiah da kaba kiar ruh ia ki jingdih duma bad kiwei kiwei ki jingdih buaid.

Kum u nongmihkhmat u la ai ka jingiaroh kaba khraw ia ki skul kiba la ioh ia ka jingithuh kaba kyrpang na ka sorkar jylla ban bud thik ia katei ka thong ban pyrkhing ia ka jingdih duma da kaba kyntu jur ia ki nongpyniaid jong ki skul bad ki khynnah skul ba kin iakhun ban kiar na ki jingdih buaid khamtam ia u drok hynrei ban minot thop ha ki jingpule khnang ba kin longbriew manbriew ha ka lawei jong ki.