Jop ka Asha Ladrymbai ban pynshai halor u Condom ha ka sngi burom World AIDS Day

Ka Mihmyntdu Community Social Welfare Association (MCSWA), Khliehriat ryngkat ka jingiatreilang ka Meghalaya AIDS Control Society (MACS), Shillong bad ka District Legal Services Authority (DLSA), East Jaintia Hills District hynne ka sngi kila kynmaw burom iaka World AIDS Day ha Khliehriat West Community Hall, Khliehriat East Jaiñtia Hills District halor ka phang kaba ong “Take the Right Path”. Ha kane ka sngi u Aditya Verma, IAS, SDO Sardar, East Jaintia Hills District, u Aditya Verma ula long kum u kongsan ryngkat ka jingdonlang u Dr.D.Shylla DM&HO, East Jaintia Hills, u Dr J. Nongtdu, Medical & Health Officer OST Centre, East Jaintia Hills District, u Dr D. Nongpluh Medical Officer incharge ICTC, u P.N Swer Panel Lawyer DLSA, East Jaintia Hills District, u Aris J Nongkynrih Chief Functionary MCSWA,  Ajoy Lanong Deputy Director Mainstreaming MACS, nalor ki nongialam shnong ki Asha ki kynhun self help group naki shnong bapher bapher bad kiwei haka jingialang ba pyniaid ka Rinibeth Patlong Programme Manager, Mihmyntdu Community Social Welfare Association (MCSWA), TI CC Khliehriat. Ki Doctor ba ai jingkren ha kane ka sngi kila pynshai halor u khñiang jingpang HIV/AIDS bad kumno u pur sted u ktah iaka met u briew kumjuh iaka pyrkhat pyrdaiñ kiba ioh ia une u khñiang. Da kaba kyntu ruh ban kiar naka jingshongkha pathar, ka jingngop dih drugs namar kane dei ka lynti ba suk bad pur sted bha une u khñiang jingpang.

Ha kajuh ka por ki kyntu ban wan shakhmat naka bynta ban phah test ialade bad dih dawai tikna ruh khnang ba une u khñiang un ym lah ban pyntroiñ. U kongsan Aditya Verma haba kren halor ka phang “Take the Right Path” u ong khnang ban lah rad dyngkhong ia une u khñiang jingpang donkam ban ai ka jingstad jingshemphang bad pynkupbor iaki khun samla naka bynta ba kin mih leit pynsngewthuh paidbah, donkam ban pynioh ka jingshakri ba iadei bad ka koit ka khiah sha baroh lang, ban pynsngewthuh ruh iaki nongshong shong halor ban pynduh pyndam ka jingpeit ibeiñ ne ñiew beiñ iaki briew ba ioh ia une u khñiang jingpang.  Bad kumba ka thong hi ka Joint United Nations Programme on HIV/AIDS(UNAIDS) ban pynduh pyndam ia une u khñiang hapoh u snem 2030 u kyntu iaka tnat ka koit ka khiah jong ka district ba kin bteng ka jingshakri ba khlem thait khnang ba ki briew kin ioh ka jingshakri ba paka.

Ha kane ka sngi la don ruh ka drama lyngkot naki VO ka Lad Rymbai Dongwah, nangta ka jingiakop extempore speech halor ka phang HIV/AIDS bala shim bynta da ki Asha naki shnong bapher, bad napdeng kine ki Asha kaba ioh rah nam jop dei ka Gracebedel Rymbai ka Asha jong ka Ladrymbai kaba kren pynshai halor u Condom da kaba ong haka juk mynta une u tiar u lah ruh ban ai jingiada haduh saw bynta kata ban ym armet, ban lait iabit jingpang HIV, jingpang STD bad Hepatitis. Kumta ka kyntu dei ban pyndonkam beit ia u condom khnang ban lait naki jingma.