Jop ka VPP 17 ha KHADC brut ka Congress

Ka Voice of the People Party (VPP) ka la khur ia ka jingjop da 17 ngut MDC ha Khasi Hills Autonomous District Council, katba ka UDP ka la jop 5 ngut, ka NPP 4, HSPDP 1 bad 2 ngut ki ki kyrtong shimet ne Independent. Kumta, ka VPP kaba la jop haduh 17 ngut ki MDC ha ka iing dorbar ba 30 ngut ki dkhot kan thaw ia Executive Committee ba thymmai ha KHADC. Katba ha JHADC ka VPP ka khlem lah ban leh bha bad ka jop tang 8 ngut ki MDC, katba ka NPP ka la jop 13 ngut, ka UDP 3, Congress 3 bad 2 ngut ki kyrtong shimet. Ka NPP kaba bat ia ka bor synshar ha ka sorkar jylla kan thaw biang ia ka Executive Committee ha JHADC ryngkat kiwei ki paralok kiba don ha ka sorkar MDA bad ki MDC shimet.

Katkum resol ilekshon MDC 2025, ha KHADC ka la pynkyndit ia bun nongialam sain hima ka jylla, khamtam ia ka Congress ka seng ba la synshar ia ka Jylla la bun snem bad ha ki District Council ka la brut syndon ym don uwei ruh ba jop ha KHADC, hynrei donbok ka lait brut ha JHADC bad jop 3 ngut ki MDC. Katba ka BJP ka seng sain hima ba synshar ia ka Ri India bad ka KHNAM ki shah brut khlem don ba jop ha baroh ar tylli ki District Council. Kane ka resol ilekshon MDC 2025, ka pynpaw ba ki paidbah ki kwah ia ka jingkylla ha ka synshar khaddar hapoh ka jylla bad kim kwah shuh ia ki nongialam barim, hynrei ki kwah ia ki nongialam bathymmai ban wanrah ka jingkylla ban sain dur thymmai ia ka synshar khaddar bad ban iada ia ka ri bad ka jaidbynriew bad ka roi ka par.

Kum ban pynpaw ki paidbah ki la duh jingshaniah ia ka sorkar MDA hapoh ka jingialam ka NPP bad kiwei ki seng synrop ka UDP, HDPDP kiba kam ia lade ki seng riewlum hynrei ki iatreilang bad ka NPP bad kane ka pynlong ia ki paidbah ban duh jingshaniah katba ka VPP mynta kan kum ka seng reiwlum ba khlain ban ialam ha Jylla.